რუსთავი 2-ის დირექტორის, ნიკა გვარამიას დღევანდელ განცხადებას ქიბარ ხალვაში გამოეხმაურა. სააგენტო ინტერპრესნიუსის ცნობით, მათ განცხადება თავად ხალვაშის ადვოკატმა პაატა სალიამ მიაწოდა. ხალვაში კურიერის სპეციალურ გამოშვებას, სადაც არხის გენერალურმა დირექტორმა ნიკა გვარამიამ საგანგებო განცხადება გააკეთა, ტელე-პერფორმანსს უწოდებს.
"მივმართავ პირადად გვარამიას, რომელმაც ახლახან მორიგი ტელე-პერფორმანსი შესთავაზა საზოგადოებას. უკვე ნათლად ჩანს, რომ თქვენ და თქვენი პოლიტიკურად ანგაჟირებული თანამოაზრეები ყველა ღონეს ხმარობთ, რომ რამენაირად გახვიდეთ სამართლებრივი სივრციდან და ჩემი სამართლებრივი დავა, რომელიც მიმართულია უმოწყალოდ შელახული საკუთრების უფლებისა და სამართლიანობის აღდგენისკენ, აქციოთ პოლიტიკურ შოუდ და ამით საკუთარ პატრონს, მიშა სააკაშვილს, მისცეთ პოლიტიკური ქულების ჩაწერის შესაძლებლობა. კოლექტიური გვარამიას ფანტაზიას მე ვერ გავყვები. მე კონკრეტულ საშიშროებას ვხედავ, რომ გვარამია დავის სამართლებრივი სივრციდან გატანის მიზნით იმაზეც კი არის წამსვლელი, რომ რუსთავი 2 ეთერიდან გათიშოს და ამით კიდევ ერთხელ მოახდინოს სიტუაციის დრამატიზება და შეეცადოს საკითხის პოლიტიზებას.
მივმართავ გვარამიას კატეგორიულად – არ გაბედო რუსთავი 2–ის გათიშვა! ილაპარაკე რაც გინდა და რამდენიც გინდა, თუნდაც მთელი საეთერო დრო შენივე პოლიტიკური მონოლოგებისთის დაგითმია. პირიქით, მოგიწოდებ, რაც შეიძლება მეტი და დიდხანს ილაპარაკო, რომ საზოგადოებამ კიდევ უფრო კარგად დაინახოს რა გამოძრავებს და რა პოლიტიკური სულისკვეთების ძალის აზრებს და სურვილებს ახმოვანებ. ილაპარაკე, მაგრამ საკუთარი და შენივე პატრონი სააკაშვილის ბნელი მიზნების გამო, არ გაბედო რუსთავი 2–ის გათიშვა." - წერია ქიბარ ხალვაშის განცხადებაში.
ცნობისთვის, რუსთავი 2-ში გამართულ საგანგებო შეხვედრაზე ტელეკომპანიის გენერალურმა დირექტორმა ნიკა გვარამიამ მის მიმართ განხორციელებულ ზეწოლასა და მუქარაზე ისაუბრა.მისივე თქმით, ხვალინდელ სასამართლო პროცესზე რუსთავი ორს ქიბარ ხალვაშს მიაკუთვნებენ. დღესვე ცნობილი გახდა, რომ საქართველოს მთავარმა პროკურატურამ, ტელეკომპანია რუსთავი 2-ის გენერალური დირექტორის, ნიკა გვარამიას, მიერ გაკეთებული განცხადების საფუძველზე, გამოძიება დაიწყო.
