მეუღლისა და შვილის მკვლელობაში ბრალდებული მაგდა პ. აცხადებს, რომ მას დაკავების შემდეგ პოლიციელებმა ფიზიკური და სიტყვიერი შეურაცხყოფა მიაყენეს. ნეტგაზეთის ცნობით, ამის შესახებ ბრალდებულმა სასამართლოს სხდომაზე თქვა, სადაც მისთვის აღკვეთის ღონისძიების შეფარდების საკითხს განიხილავენ. ბრალდებულის მტკიცებით, მას პოლიციელები ხელებზე და თავზე სცემდნენ. კითხვაზე, თუ კონკრეტულად ვინ სცემდა, მ.პ-მ უპასუხა, რომ "ამოვიცნობ, სახელი და გვარები არ ვიცი".
ნეტგაზეთის ინფორმაციით, ადვოკატის თქმით, საქმეში მართლაც დევს ცნობა, რომ ბრალდებულს დაზიანებები აქვს და ის 20 დეკემბერს სტაციონარშიც იყო მოთავსებული. მოსამართლემ პროკურატურას მიმართა, რომ ბრალდებულის განცხადებით დაინტერესდნენ.
ქმრისა და შვილის მკვლელობაში ბრალდებულის მიმართ გამოძიება სისხლის სამართლის კოდექსის 109-ე მუხლით მიმდინარეობს, რაც დამამძიმებელ გარემოებებში განზრახ მკვლელობას გულისხმობს. სსკ-ის ეს მუხლი 20-წლამდე ან სამუდამო პატიმრობას ითვალისწინებს.
ბრალდებული დანაშაულს არ აღიარებს, თუმცა, მ.პ-ს დაკითხვაზე გადაყვანიდან მალევე შსს-მ საქმე "ცხელ კვალზე გახსნილად" გამოაცხადა და თქვა, რომ ბრალდებული ქმრის და შვილის მკვლელობას აღიარებდა. მოგვიანებით, შსს-მ განმარტა, რომ მ.პ-მ გამოძიებას ურთიერთსაწინააღმდეგო ჩვენებები მისცა.
