ძლიერი ნისლის გამო თბილისის საერთაშორისო აეროპორტში წუხელ დაგეგმილი ათამდე რეისი ვერ შესრულდა. ფრენების ნაწილი გადაიდო, ნაწილის შემთხვევაში კი, ავიაკომპანიებს მეზობელი ქვეყნების – სომხეთისა და აზერბაიჯანის აეროპორტების გამოყენება მოუწიათ.
"თურქეთის ავიახაზების 2 რეისი გაუქმდა. თურქეთიდან გაუქმდა ასევე "პეგასუსისა" და "ატლას გლობალის" მიერ დაგეგმილი რეისები. გადაიწია კიევის რეისმა - კიევიდან თვითმფრინავი 00:10 საათზე უნდა მოფრენილიყო, თუმცა რეისი 12:30 საათზე შესრულდება. ასევე რამდენიმე საათით დაგვიანებით შესრულდება ფრენა მოსკოვიდანაც – თვითმფრინავი, წუხელ, 01:50 საათზე უნდა მოფრენილიყო, თუმცა ფრენა 12:40 საათზე განხორციელდება. გარდა ამისა, თბილისში მომავალი "ფლაი დუბაის" თვითმფრინავი დაეშვა ერევანში. ვერ მივიღეთ კიდევ ერთი თვითმფრინავი, რომელიც ჩინეთიდან უნდა მოფრენილიყო – ძლიერი ნისლის გამო ის ბაქოს აეროპორტში დაჯდა", - უთხრეს ინტერპრესნიუსსს თბილისის აეროპორტში.