საფრანგეთში, კალეს პორტთან, ე.წ. ჯუნგლებში მიგრანტებსა და პოლიციელებს შორის შეტაკებები მოხდა. შეტაკებები მას შემდეგ დაიწყო, რაც საფრანგეთის პოლიციამ მიგრანტთა ბანაკის ნაწილის დემონტაჟი დაიწყო. ამას მიგრანტების პროტესტი მოჰყვა. არეულობაში 150-ზე მეტი მიგრანტი მონაწილეობდა, რომლებმაც მინიმუმ 12 კარავი გადაწვეს, სამართალდამცავებს კი ქვები დაუშინეს. პოლიციამ მათ წინააღმდეგ ცრემლსადენი გაზი გამოიყენა.
ოფიციალური მონაცემებით, ამ ბანაკში 1000-მდე მიგრანტი ცხოვრობდა, თუმცა არაოფიციალური ინფორმაციით, მიგრანტთა რაოდენობა ბევრად მეტი იყო. BBC-ის ცნობით, საფრანგეთის მთავრობა მიგრანტების სხვადასხვა რეგიონში გადანაწილებას და მათთვის თავშესაფრის მიცემას აპირებს, თუმცა მიგრანტებს თითის ანაბეჭდების ჩაბარება და საფრანგეთში თავშესაფრის მიღება არ სურთ, რადგან მათი მიზანი დიდ ბრიტანეთში გადასვლაა.