თურქეთში პრეზიდენტ რეჯეფ ტაიპ ერდოღანის კრიტიკის გამო ჰოლანდიელი ჟურნალისტი ებრუ უმარი დააკავეს. უმარი თურქეთის დასავლეთით მდებარე ქალაქ კუშადასში ისვენებდა, როდესაც პოლიციამ დააკავა. როგორც ჟურნალისტი Twitter-ზე წერს, ის გაათავისუფლეს, მაგრამ ქვეყნის დატოვების უფლებას არ აძლევენ.
მომხდარს ჰოლანდიის საგარეო საქმეთა სამინისტროც ადასტურებს.
ჟურნალისტის დაკავება სტატიას უკავშირდება, რომელიც ჰოლანდიურ გამოცემა Dutch Metro-სთვის დაწერა და რომელშიც ერდოღანსა და მის პოლიტიკას აკრიტიკებდა.
სტატიაში უმარი ერდოღანს დიქტატორს უწოდებდა.
აღსანიშნავია, რომ 2014 წლიდან პროკურორებმა თურქეთში ერდოღანის კრიტიკის გამო 1800 ჟურნალისტის წინააღმდეგ აღძრეს საქმე.