კორცხელის ინციდენტი

EPP: ოპოზიციაზე თავდასხმა საფრთხეს უქმნის ევროინტეგრაციას

maszol.ro

ევროპის სახალხო პარტიის პრეზიდენტი ჯოზეფ დოლი სოფელ კორცხელში მომხდარ ინციდენტთან დაკავშირებით უკიდურეს შეშფოთებას გამოთქვამს. ის მომხდარს ერთიან ნაციონალურ მოძრაობაზე პოლიტიკურად მოტივირებულ ძალადობას უწოდებს. როგორც ევროპარლამენტარი განცხადებაში წერს, საქართველოში მიმდინარე მოვლენები არა მხოლოდ არღვევს საერთაშორისო სტანდარტებსა და კანონის უზენაესობას, უპირველეს ყოვლისა, საფრთხეს უქმნის წინასაარჩევნო გარემოს და ევროინტეგრაციას.

"უკიდურესად ვგმობ ამ აღმაშფოთებელ, პოლიტიკურად მოტივირებულ ძალადობას სოფელ კორცხელში ერთიანი ნაციონალური მოძრაობის ლიდერებზე, წევრებსა და დეპუტატებზე. ეს თავდასხმა ოპოზიციის, ერთიანი ნაციონალური მოძრაობის მიმართ უკვე ფართოდ გავრცელებული ძალადობის კიდევ ერთი თვალსაჩინო მაგალითია. ვიმედოვნებ, ყველა დაშავებული სწრაფად გამოჯანმრთელდება.

ოპონენტების სამართლებრივი დევნა და დაშინება აბსოლუტურად მიუღებელი და შეუსაბამოა ევროპულ სტანდარტებთან. ის დამნაშავეებიც კი, რომლებიც ოპოზიციის ოფისებს თავს დაესხნენ, ამ დრომდე არ დასჯილან. საქართველოს ხელისუფლებამ აუცილებლად, დაუყოვნებლივ უნდა დასაჯოს დამნაშავეები. არ უნდა არსებობდეს დაუსჯელობა.

უკიდურესად შეშფოთებული ვრჩები სისტემატური ძალადობის მიმდინარე საშიში ტენდენციისა და სასამართლო სისტემასა და მედიის თავისუფლებაზე თავდასხმების გამო.

ხელისუფლება უნდა იყოს დემოკრატიული პრინციპებისა და კანონის უზენაესობის გარანტი. მიმდინარე მოვლენები არა მხოლოდ არღვევს საერთაშორისო სტანდარტებსა და კანონის უზენაესობას, უპირველეს ყოვლისა საფრთხეს უქმნის წინასაარჩევნო გარემოს და ევროინტეგრაციას",- წერს ევროპის სახალხო პარტიის პრეზიდენტი გავრცელებულ განცხადებაში.

კომენტარები