თელავის რაიონულმა სასამართლომ ვალერი კვარაცხელიას პარტიის წევრს, თემურ ფიფიას აღკვეთის ღონისძიებად 1000-ლარიანი გირაო შეუფარდა. სასამართლო პროცესი 9 სექტემბერს გაიმართება.
თემურ ფიფია თელავში, მუსიკალური სასწავლებლის შენობასთან 4 აგვისტოს დააკავეს. პარტია სოციალისტური საქართველოს წევრმა ჟურნალისტ რომან ქევხიშვილს სიტყვებისთვის - "რუსეთი ოკუპანტია, პუტინი მკვლელია" გაარტყა.
სოციალისტური საქართველო ყრილობას მართავდა. ახალგაზრდული ფრთის წარმომადგენლებმა კონტრაქცია ჩაატარეს. მათი განცხადებით, მაშინ, როდესაც რუსეთს საქართველოს ტერიტორიის 20% ოკუპირებული აქვს, დაუშვებელია პრორუსული პოლიტიკური იდეოლოგიის მქონე პარტიის დაფუძნება. კონტრაქციის მონაწილეებმა სირცხვილის კორიდორი მოაწყვეს.
