ვლადიმერ ბედუკაძის პარტია "ცენტრისტების" შესახებ პრემიერმა სპეციალირი განცხადება გაავრცელა. სამპუნქტიანი მიმართვით პრემიერი მედიას მოუწოდებს არ გახდეს ანტისახელმწიფოებრივი პროპაგანდის მსხვერპლი და ტირაჟირებამდე თავად განსაჯონ ამა თუ იმ მიმართვის შინაარსი. პრემიერის განცხადებაში ნათქვამია, რომ მთავრობა გამოიყენებს მის ხელთ არსებულ ყველა ბერკეტს, რათა ქვეყანაში არ დაუშვას ანტისახელმწიფოებრივი პროპაგანდა
"მინდა გამოვეხმაურო საზოგადოების შეშფოთებას საზოგადოებრივ მაუწყებელზე გასული უფასო საარჩევნო რეკლამის გამო, რომელიც ანტისახელმწიფოებრივ მოწოდებებს შეიცავს, და აღვნიშნო:
1. დღეს, როდესაც საქართველო ისტორიული არჩევნების წინაშეა, რომელიც განმსაზღვრელია ჩვენი დემოკრატიული სახელმწიფოებრიობის და, შესაბამისად, დამოუკიდებლობის განმტკიცების გზაზე, რომელსაც დამოუკიდებლობის აღდგენის შემდეგ საქართველოს მრავალი მოქალაქე შეეწირა, უმნიშვნელოვანესია, რომ ყველა უწყებამ, ორგანიზაციამ თუ ფიზიკურმა პირმა იგრძნოს ეს პასუხისმგებლობა.
2. საქართველოს მთავრობამ ყველაფერი გააკეთა ბოლო წლების განმავლობაში, რათა მედია ყოფილიყო დამოუკიდებელი, თუმცა დამოუკიდებლობა არ ნიშნავს უპასუხისმგებლობას. მედიას ყველაზე დიდი პასუხისმგებლობა ეკისრება, რათა არ მოახდინოს ანტისახელმწიფოებრივი ინფორმაციის ტირაჟირება. ჩვენ მივესალმებით საზოგადოებრივი მაუწყებლის გადაწყვეტილებას, შეაჩეროს ისეთი საარჩევნო აგიტაცია, რომელიც მიმართულია სახელმწიფოებრიობის და სუვერენიტეტის წინააღმდეგ. ასევე, მოვუწოდებთ ყველა სხვა მედიასაშუალებას, მაქსიმალურად ეცადონ, არ გახდნენ პროპაგანდის მსხვერპლი, თუნდაც გაუაზრებელი მოქმედებებით. სწორედ წინასაარჩევნო პერიოდში გაზრდილი ანტისახელმწიფოებრივი პროპაგანდის ფარგლებში გვმართებს განსაკუთრებული ყურადღება.
3. საქართველოს მთავრობა კვლავაც გამოიყენებს მის ხელთ არსებულ ყველა კანონიერ და დემოკრატიულ ბერკეტს, რათა არ დაუშვას ანტისახელმწიფოებრივი პროპაგანდა და მიესალმება ყველა შესაბამის ინიციატივას არასამთავრობო თუ პოლიტიკური სექტორის მხრიდან",-წერია პრემიერის განცხადებაში.
თავისმხრივ მკვეთრად პრორუსული პარტიის ლიდერი ვლადიმერ ბედუკაძე მის კრიტიკოსებს სახელმწიფოს მოღალატეებს უწოდებს და ამბობს, რომ ის მხოლოდ ორი ადამიანის აზრის გაზიარებას გეგმავს, ესენი ბიძინა ივანიშვილი და პატრიარქი ილია მეორე არიან.
საზოგადეობრივ მაუწყებელს ვლადიმერ ბედუკაძის პარტიის რეკლამის ეთერში გაშვებით კანონი არ დაურღვევია, პირიქით, მან ახალი კანონმდებლობის მოთხოვნები შეასრულა, რადგანაც ქართული ოცნების მიერ მიღებული კანონი მას არჩევნებში მონაწილე ყველა პოლიტიკური პარტიის რეკლამის გაშვებას ავალდებულებდა.
