არაფორმალური მმართველობა

ხიდაშელი: არაფორმალურ მმართველობაზე ადრეც ვლაპარაკობდით, მას სხვა სახელს ვეძახდით

ტაბულა

რესპუბლიკური პარტიის ზესტაფონის მაჟორიტარი კანდიდატის თინა ხიდაშელის განცხადებით, მისი პარტია ადრეც საუბრობდა ბიძინა ივანიშვილის არაფორმალურ მმართველობაზე, თუმცა, სხვა ტერმინს იყენებდა. ხიდაშელმა ტაბულას ეთერში, გადაცემა თეორემაში თქვა, რომ პოლიტიკის დეპერსონალიზაცია რესპუბლიკელებმა 2014 წლის სექტემბერში მოითხოვეს. ტაბულამ ხიდაშელს ჰკითხა, "თქვენ ბოლო პერიოდში თქვით, რომ ბიძინა ივანიშვილი არის ადამიანი, ვინც რეალურად მართავს ქვეყანას. არაფორმალური მმართველობის თემა მუდმივად იყო ამ წლების მანძილზე განსჯის საგანი, თუმცა თქვენ საპირისპირო პოზიცია გქონდათ და ამბობდით, რომ მას პირს ვერ ამოუკერავთ. რომელ თინა ხიდაშელს უნდა დაუჯეროს ამომრჩეველმა?". თინა ხიდაშელის თქმით, ამ სიტყვებს ახლაც გაიმეორებს.

"ეს ერთი და იგივეა აბსოლუტურად, დიახ, ამას ვამბობდი და დღესაც იგივეს გავიმეორებ, რომ მას პირს ვერ ამოუკერავთ და ასე გრძელდება დღესაც, ოღონდ განსხვავება ის არის, რომ დღეს წინასაარჩევნო კამპანიაა და ეს ყველაფერი ღია ეთერში ხდება. მანამდე, ასეთი ინტენსივობით, ასეთი რეგულარობით, ასეთი სპეციფიკური ხაზგასმებით ამისი აუცილებლობა არ არსებობდა. მე იგივეს ვიმეორებ, მას აქვს განცდა, რომ არის ქვეყანაში ყველაზე გავლენიანი ადამიანი, ამიტომ მხოლოდ იმის გამო, რომ მე, თქვენ ან ვინმე სხვა სხვანაირად იფიქრებს, მას პირს ვერავინ ვერ ამოუკერავს. აქ განსხვავება იმაშია, რომ ჩვენ ერთადერთი რამის გამო დავიწყეთ პასუხის გაცემა, მან არ დაამთავრა შეურაცხყოფა, ეს აღარ ეტევა იმ ფარგლებში, რომ "კი, ადამიანს განცდა აქვს, რომ ძალიან მაღალი ნდობა აქვს და ამიტომ, ყველაფერზე აზრს გამოთქვამს". მე არ ვუკრძალავ არავის აზრის გამოთქმას, მაგრამ როცა შეურაცხყოფის კასკადი მოდის შენ წინააღმდეგ, შენც იწყებ პასუხის გაცემას" - ამბობს ხიდაშელი.

თავდაცვის ყოფილი მინისტრის თქმით, რესპუბლიკური პარტია იყო პირველი, ვინც არაფორმალურ მმართველობაზე ალაპარაკდა, თუმცა, ამას სხვა სახელი დაარქვა.

"როდესაც პრემიერი შეიცვალა, მაშინაც გავაკეთე განცხადება. მანამდეც, 2014 წლის სექტემბერშიც. თქვენ თუ ქრონოლიგიას ნახავთ, რესპუბლიკელები იყვნენ პირველი პოლიტიკური ძალა, (მაშინ თავისუფალი დემოკრატები ისევ კოალიციაში იყვნენ), როცა ჩვენ გამოვაქვეყნეთ პირველი წერილი და მოვითხოვეთ პოლიტიკის დეპერსონალიზაცია. არაფორმალური მმართველობა არ დავარქვით ჩვენ მაშინ ამას, სხვა სხვა სახელი დავარქვით, მაგრამ იმ წერილს ვინც წაიკითხავს, ნამდვილად მიხვდება, რომ ეს ერთი და იგივე ამბავია. მერე დაერქვა ამას არაფორმალური მმართველობა და ეს უფრო პოპულარული ტერმინი გახდა" - თქვა ხიდაშელმა.

თეორემას წამყვანის კითხვაზე, "თქვენ ადრეც წუხდით არაფორმალურ მმართველობაზე და ახლაც წუხართ, ამის თქმა გინდათ?", რესპუბლიკური პარტიის წევრი პასუხობს, რომ "ჩვენ 2014 წლის სექტემბერში გამოვაქვეყნეთ წერილი, სადაც პირდაპირ მოვითხოვეთ პოლიტიკის დეპერსონალიზაცია. ეს იყო გრძელი შიდა დისკუსიების შედეგი, როდესაც ჩვენ ვნახეთ, რომ შიდა დისკუსიით შედეგი არ დგებოდა, უკვე შემდეგ, (პარტნიორებმა იცოდნენ ამის შესახებ, ეს მათთვის სიურპრიზი არ იყო) ჩვენ საჯაროდ გამოვაქვეყნეთ წერილი და ვთქვით, რომ უნდა დამთავრდეს ქვეყანაში პოლიტიკის პერსონალიზაცია და უნდა მოხდეს დეპერსონალიზაცია. ბიძინა ივანიშვილზე იყო ეს წერილი".

თინა ხიდაშელს გადაცემის წამყვანმა შეახსენა, რომ ამას მოჰყვა პარლამენტის თავმჯდომარის სტატია New York Times-ში, სადაც დავით უსუფაშვილი წერდა, რომ ივანიშვილმა სამშობლოსთვის სიცოცხლე ჯარისკაცივით გაწირა. აღსანიშნავია, რომ NYT-ის ცნობით, 2014 წლის 16 ოქტომბერს გამოქვეყნებული სტატია ფასიანი რეკლამა იყო.

"დათომ რამდენჯერმე უკვე თქვა, რომ ის დღესაც ხელს აწერს იმ წერილს და დღესაც გვერდში დაუდგება მას, კარგი საქმეების კეთებისას, მაგრამ ეს არ ნიშნავს, რომ დეპერსონალიზაცია არ არის საჭირო" - ამბობს თავდაცვის ყოფილი მინისტრი.

აღსანიშნავია, რომ პოლიტიკის დეპერსონალიზაციის მოთხოვნაზე რესპუბლიკური პარტიის წერილი ინტერნეტსივრცეში არ იძებნება, მათ შორის, არც დავით უსუფაშვილის და არც რესპუბლიკური პარტიის ოფიციალურ Fb-გვერდებზე, სადაც მათი სიახლეები ქვეყნდება. 2014 წლის სექტემბერში რესპუბლიკურ პარტიას მხოლოდ მაესტროს ცხრიანში პარტიის ერთ-ერთი წევრის დავით ბერძენიშვილის ინტერვიუ აქვს გამოქვეყნებული. ბერძენიშვილი მაშინ ამბობდა, რომ "ბიძინა ივანიშვილმა გააკეთა ძალიან დიდი საქმე და მისი ეს საქმე იქნება ათჯერ უფრო დიდი, თუ ჩვენ მივიღებთ ივანიშვილის ჩაყრილ პოლიტიკურ საფუძველში ისეთ ინსტიტუციურ მმართველობას პოლიტიკურ ძალებსა და პოლიტიკურ შტოებს შორის, რომელიც არ გააჩენს კითხვებს - კიდევ მართავს თუ არა ივანიშვილი ქვეყანას".

კომენტარები