გლობალურ ბაზრებზე დონალდ ტრამპის აშშ-ის 45-ე პრეზიდენტად არჩევამ შოკის ეფექტი იქონია. S&P 500-ის ინდექსი 5%-ით შემცირდა, შესუსტდა დოლარის ინდექსი (DXY), რომელმაც რამდენიმე საათის მანძილზე 98-დან 95-მდე დაიწია, მექსიკური პესო კი 12%-ით დაეცა. ბაზარზე არსებული გაურკვევლობის გამო 4.9%-ით გაიზარდა ოქროს ღირებულება, ეს BREXIT-ის შემდეგ ოქროს ყველაზე დიდი გამყარებაა. საერთაშორისო ბაზარზე არსებობდა მოლოდინი, რომ პრეზიდენტი ჰილარი კლინტონი გახდებოდა.
დონალდ ტრამპის პრეზიდენტად არჩევის შედეგები საერთაშორისო ბაზრებზე:
- S&P 500 ინდექსი 5%-ით გაუფასურდა
- Euro Stoxx 50 ინდექსი 4.3%-ით გაუფასურდა
- MSCI აზიური ინდექსი 2.6%-ით გაუფასურდა
- მექსიკური პესო 12%-ით გაუფასურდა
- იაპონური იენი 2.4%-ით გამყარდა
- ევრო და შვეიცარიული ფრანკი 1.2%-ით გამყარდა
- ოქრო 4.8%-ით გაძვირდა, BREXIT-ის შემდეგ ყველაზე დიდი გაძვირება
- ნედლი ნავთობი გაიაფდა 4.3%-ით
- აშშ-ის 10-წლიანი სახაზინო ვალდებულებების ღირებულება 2%-ით შემცირდა
მექსიკური პესო
მექსიკური პესოს მკვეთრი დევალვაცია დონალდ ტრამპის წინასაარჩევნო განცხადებებს უკავშირდება. ტრამპი ხისტი სამიგრაციო პოლიტიკის მხარდამჭერია, ის მექსიკა-ამერიკას შორის კედლის აშენებას ითხოვს. სამიგრაციო პოლიტიკასთან ერთად ტრამპი ასევე გეგმავს ბილ კლინტონის დროს მექსიკა-აშშ-კანადას შორის დადებული თავისუფალი სავაჭრო შეთანხმების NATFA-ს გადახედვას, რაც სავარაუდოდ ამ ქვეყნებს შორის ვაჭრობის მოცულობაზე ნეგატიურად აისახება.
ოქრო
ოქროს 4.8%-ით გაძვირება ბაზარზე არსებული გაურკვევლობის ზრდას უკავშირდება. არსებული მდგომარეობით, უნცია ოქროს ღირებულება $1,317-ს შეადგენს. ბრიტანეთის ისტორიული რეფერენდუმის შედეგების შემდეგ ეს ოქროს ყველაზე მკვეთრი გამყარებაა.
