2016 წლის მესამე კვარტალში საქართველოში პირდაპირი უცხოური ინვესტიციების (FDI) სახით $463 მილიონი შემოვიდა, რაც წინა წლის შესაბამის პერიოდთან შედარებით 4%-ით ნაკლებია. ამის შესახებ საქსტატის მიერ დღეს გამოქვეყნებული ანგარიშიდან გახდა ცნობილი.
რაც შეეხება იანვარ-სექტემბრის მონაცემებს, ამ პერიოდში ინვესტიციებმა $1.3 მილიარდი შეადგინა, რაც წინა წელთან შედარებით 5%-ით მეტია.
პირდაპირი უცხოური ინვესტიციების მიხედვით უმსხვილესი ინვესტორი ქვეყნების ათეული ასე გამოიყურება:
- აზერბაიჯანი - $434 მილიონი
- თურქეთი - $196 მილიონი
- ლუქსემბურგი - $68 მილიონი
- ჩეხეთი - $66 მილიონი
- ნიდერლანდები - $63 მილიონი
- პანამა - $39 მილიონი
- აშშ - $38 მილიონი
- კვიპროსი - $29 მილიონი
- ჩინეთი - $25 მილიონი
- იაპონია - $5 მილიონი
- დანარჩენი ქვეყნები - $334 მილიონი
ეკონომიკის სექტორების მიხედვით, საინვესტიციოდ ყველაზე მეტი მიმზიდველობით ტრანსპორტი და კავშირგაბმულობა გამოირჩევა, აქ სამი კვარტლის მონაცემებით $517 მილიონი ჩაიდო, შემდეგ მოდის საფინანსო სექტორი ($168 მილიონი) და ენერგეტიკა ($131 მილიონი). ენერგეტიკაში განხორციელებული ინვესტიციების მოცულობა 2014 წლიდან მოყოლებული მცირდება, გასული წლის პირველ სამ კვარტალში ენერგეტიკაში ინვესტიციების სახით $133 მილიონი, 2014 წელს კი $153 მილიონი ჩაიდო.
ინვესტიციების კლება სხვა სექტორებშიც შეიმჩნევა, 2015 წლის პირველ სამ კვარტალში სამთომომპოვებელ სექტორში $78 მილიონი ჩაიდო, წელს კი სექტორში ჩადებული ინევსტიციების მოცულობა $31 მილიონია.
უმსხვილესი ინვესტორი ქვეყნების სიაში მოხვდა ოფშორული ზონაც (პანამა), ქართული ბიზნესები ოფშორებს ხშირად რეინვესტირებისთვის იყენებენ.
საქსტატის მონაცემებით, რეინვესტიციის მოცულობამ $439 მილიონი შეადგინა, ეს კი მთლიანი უცხოური ინვესტიციების პორტფელის 33%-ია.
საქსტატის მონაცემები წინასწარია და შესაძლოა შეიცვალოს.