ერთიანი ნაციონალური მოძრაობის წევრი გივი თარგამაძე თბილისის პროკურატურაში დღეს, 13:00 საათზეა დაბარებული.
საგამოძიებო უწყებაში დაბარება გივი თარგამაძის მანქანაში აფეთქების საქმეს უკავშირდება.
9 დეკემბერს ყოფილი დეპუტატი ამბობდა, რომ გამოძიება საქმის მასალების გადაცემაზე უარს აცხადებდა, მიუხედავად იმისა, რომ დაზარალებულად ცნეს.
მიმდინარე წლის 4 ოქტომბერს მე-8 მოწვევის პარლამენტის დეპუტატ გივი თარგამაძის მკვლელობა მანქანის აფეთქების გზით სცადეს. თარგამაძე გადარჩა, თუმცა, დაშავდნენ გამვლელები.
შინაგან საქმეთა სამინისტრომ გივი თარგამაძის აფეთქების საქმეზე ერთი პირი დააკავა, ხოლო მეორეს ბრალი დაუსწრებლად წარუდგინა - ამის შესახებ უწყებაში გამართულ ბრიფინგზე გახდა ცნობილი. შსს-ს ცნობით, იარაღის უკანონო შეძენა-შენახვა-ტარების მუხლით დაკავებულია 1976 წელს დაბადებული ბ.ჩ., განზრახ მკვლელობის მცდელობის მუხლით კი, ბრალი 1974 წელს დაბადებულ დ.ხ-ს წარედგინა.