საქართველოში შინაური პირუტყვის რეგისტრაციის პროექტი მიმდინარეობს, რომლის ფარგლებშიც მსხვილფეხა და წვრილფეხა შინაური ცხოველები აღირიცხებიან. ასევე მიღებულია დადგენილება, ღორების იდენტიფიკაცია-რეგისტრაციისა და მათი ერთიანი ელექტრონული ბაზის შექმნის შესახებ.
ცხოველებს სურსათის ეროვნული სააგენტო აღრიცხავს, სააგენტოს ინფორმაციით, მათ უკვე აღრიცხული ჰყავთ 2 მილიონი მსხვილფეხა პირუტყვი და 200 ათასი წვრილფეხა პირუტყვი, ღორების რეგისტრაცია კი 2018 წლიდან დაიწყება. რეგისტრაცია ღორებისთვის სპეციალური საყურეების დატანით მოხდება, თითოეულ ღორს 8-ნიშნიანი საიდენტიფიკაციო ნომერი მიენიჭება. რეგისტრაციის საფასურს სახელმწიფო ფარავს.
ფოტო: nsdi.gov.ge
პირუტყვის პასპორტიზაცია-რეგისტრაცია ევროკავშირის მოთხოვნას წარმოადგენს, საქართველოს აქვს ვალდებულება, DCFTA-ს მეოთხე თავთან დააახლოოს შინაური ცხოველების მონაცემთა ბაზა (ევროკომისიის 2008/71/EC დირექტივის კოდიფიცირებული ვერსიის შესაბამისად).
13 დეკემბერს მთავრობის მიერ გამოქვეყნებული დადგენილებით, პროექტის მიზნები ასე გამოიყურება:
- ღორის და მისი სადგომის შესახებ ერთიანი საინფორმაციო ბაზის შექმნა და აღრიცხვიანობის რეგულირება.
- ღორის და მისი სადგომის შესახებ სრული ინფორმაციის ფლობა და მიკვლევადობა.
- ღორის ჯანმრთელობის დაცვა, ეპიდემიოლოგიური მდგომარეობის მართვა და ვეტერინარული კეთილსაიმედოობის უზრუნველყოფა.
- საზოგადოებრივი ჯანმრთელობის დაცვა და მომხმარებლისათვის სარწმუნო ინფორმაციის მიწოდება ღორისგან მიღებული პროდუქტების წარმოშობისა და უვნებლობის შესახებ.
- ქვეყნის შიგნით ღორის გადაადგილებასა და ექსპორტ-იმპორტზე ვეტერინარული კონტროლის განხორციელება. სანაშენე საქმიანობის გაუმჯობესება-სრულყოფა.
პროექტის შედეგად ქვეყანაში უნდა გაჩნდეს ერთიანი ბაზა, რომელშიც აღრიცხული იქნება:
- სადგომი - სადგომში არსებული ცხოველების რაოდენობა და მათი ID
- ცხოველი - ცხოველის ჯიში, სქესი ასაკი, მშობლის ID
- მფლობელი - ფიზიკური/იურიდიული პირი და მისი საკონტაქტო
- გადაადგილება - ცხოველის გადაადგილება, სადგომის შეცვლა, მფლობელის შეცვლა, სეზონური საძოვრები
- ვაქცინაცია - თურქული, ჯილეხხი, სხვა.
- (ჯანმრთელობის ისტორია) - ბრუცელოზი, ტუბერკულოზი, სხვა
- სტატუსი - ცხოველის ჯანმრთელობის მდგომარეობა
