გერმანული საფინანსო გიგანტი Deutsche Bank-ი ბრიტანულმა და ამერიკულმა რეგულატორებმა $628 მილიონით დააჯარიმეს, რისი მიზეზიც Deutsche Bank-ის მოსკოვის ფილიალის მიერ რუსი კლიენტებისთვის გაკეთებული "სარკისებური ვაჭრობაა". როგორც ცნობილია ამ გზით, Deutsche Bank-მა 2012-2014 წლებში $10 მილიარდის მოცულობის ტრანზაქციები განახორციელა.
ბრიტანული რეგულატორის ინფორმაციით, Deutsche-ემ აღნიშნული ტრანზაქციები ისე განახორციელა, რომ ფულის წარმომავლობა დაფარულიყო. "სარკისებური გარიგებები" მოსკოვიდან დიდი მოცულობით ფულის გადინებისთვის ხდებოდა.
Deutsche-ემ ამ დრომდე დაუდგენელი პირების კუთვნილი თანხები დაახლოებით $10 მილიარდი, რუსეთიდან ოფშორულ ბანკებში გადარიცხა. აღნიშნული ტრანზაქციები ფულის გათეთრების მაღალ რისკს შეიცავს.
Deutsche $425 მილიონს გადაუხდის ნიუ-იორკის ფინანსური სერვისის რეგულატორს, £163 მილიონ გირვანქას კი ბრიტანელ რეგულატორს FCA-ს გადაუხდის.
Deutsche ჯარიმის გადახდას დათანხმდა, ბანკის მიერ გავრცელებულ განცხადებაში წერია, რომ ბოლო წლების მანძილზე მნიშვნელოვნად გაუმჯობესდა ფულის გათეთრების კონტროლი, მას შემდეგ რაც აღნიშნული ტრანზაქციები განხორციელდა.
