თბილისის აეროპორტში ექსპრეზიდენტ ვიქტორ იანუკოვიჩის დროინდელი მაღალჩინოსანი, ენერგეტიკის მინისტრის ყოფილი მოადგილე იგორ კირიუშინი დააკავეს, რომელიც ინტერპოლის წითელი ცირკულარით იძებნებოდა. ის საქართველოში რუსეთიდან შემოდიოდა.
"ი.კ.-ს ბრალად ედება უკრაინის სისხლის სამართლის კოდექსის 255-ე მუხლის 1-ლი ნაწილით და 191-ე მუხლის მე-5 ნაწილით გათვალისწინებული დანაშაულის ჩადენა, რაც კრიმინალური ორგანიზაციის შექმნას და თანამდებობის ბოროტად გამოყენებით ქონების უკანონო მითვისება-გაფლანგვას გულისხმობს", - ნათქვამია შინაგან საქმეთა სამინისტროს განცხადებაში.
შსს-სვე ცნობით, დაკავებულის მიმართ კანონით გათვალისწინებული წინასაექსტრადიციო პროცედურები მიმდინარეობს.
