საფრანგეთის საპრეზიდენტო არჩევნების პირველი ტურის გამარჯვებულის, ემანუელ მაკრონის საარჩევნო კამპანიის გუნდი რუსულ საინფორმაციო სააგენტოებს ღონისძიებიდან ბლოკავს. ამის შესახებ, მაკრონის პრესსპიკერმა განაცხადა.
პრესსპიკერი აკრძალვის მიზეზად Sputnik-ისა და Russia Today-ს მიკერძოებულობას ასახელებს. მისივე თქმით, ორივე მედია რუსული პროპაგანდის მატარებელია და მოსახლეობას ყალბ ინფორმაციას აწვდის.
საფრანგეთის საპრეზიდენტო არჩევნების მეორე ტური 7 მაისს გაიმართება. ერთმანეთს პოლიტიკური მოძრაობა En Marche-ს ლიდერი, ცენტრისტი ემანუელ მაკრონი და ულტრა-მემარჯვენე მარინ ლე პენი დაუპირისპირდებიან.
არჩევნების წინ მომზადებული კვლევების თანახმად, მეორე ტურში უდავო ფავორიტად ემანუელ მაკრონი მიიჩნევა. გამოკითხვები გვიჩვენებს, რომ არჩევნების მეორე ტურში ლე პენი ხმების მხოლოდ 39 %-ს მიიღებს, მაკრონი კი 61 %-ს.
