ანაკლიის ღრმაწყლოვანი პორტის ოპერატორი ამერიკული კომპანია SSA Marine იქნება. ამერიკული კომპანია „ანაკლიის განვითარების კონსორციუმმა" საკონტეინერო ტერმინალის ოპერატორის შერჩევის პროცესში მსოფლიოს შვიდ მსხვილ კომპანიას შორის შეარჩია.
აშშ-ის ერთ-ერთი მსხვილი სანავსადგურე სატერმინალო ოპერატორის, SSA Marine-ის სათავო ოფისი სიეტლში მდებარეობს. კომპანიის მფლობელობაშია ტერმინალები მსოფლიოს 9 ქვეყანაში. SSA Marine წლიურად 27.2 მილიონ კონტეინერს (TEU) ამუშავებს. SSA Marine-ის საქმიანობის სფეროს ასევე განეკუთვნება მშრალი ტვირთის დამუშავება და სამგზავრო-საკრუიზო გადაყვანები.
ანაკლიის პორტის ინვესტორი TBC ჯგუფია, ეს ქვეყანაში მიმდინარე ყველაზე მსხვილი ინფრასტრუქტურული პროექტია, რომლის პირველი ეტაპიც 2020 წელს დასრულდება. პროექტის ჯამური ღირებულება $2 მილიარდს აღემატება.