საქართველოს მთავრობას ერაყის, ლიბანის, ავღანეთის, კამერუნის, კოტ-დიუვარის, კონგოს, გამბიის, ტუნისის, სომალისა და განის რესპუბლიკის მოქალაქეების რეადმისია სურს. ამ ქვეყნებთან რეადმისიის შეთანხმების მიღწევის სურვილი მთავრობამ 30 ივნისის განკარგულებებით დააფიქსირა. დოკუმენტებში საუბარია "შეთანხმების ტექსტის მიღების მიზნით, ნოტების გაცვლის გზით, მოლაპარაკების გამართვის თაობაზე".
მხარეებს შორის რეადმისიის შეთანხმება გულისხმობს უკანონო მიგრაციის შესახებ გაძლიერებულ თანამშრომლობას და სხვა ქვეყანაში უნებართვოდ მყოფ პირების სამშობლოში უსაფრთხო დაბრუნებას.
აღსანიშნავია, რომ 14 ივლისს, ე.წ. ქართველთა მარშის მონაწილეებმა აქცია გამართეს და ხელისუფლებას ულტიმატუმი წაუყენეს - "ყველა არალეგალმა უცხოელმა (ირანელები, არაბები, აფრიკელები და ა.შ.) დატოვოს საქართველოს ტერიტორია."
