იაპონის ქალაქ გამაგორის ხელისუფლება მოსახლეობას აფრთხილებს, თავი შეიკავონ თევზი "ფუგუს" გამოყენებისგან, რადგან მისი შხამიანი ულუფა ბაზარზე შეცდომით გაიყიდა.
"ჩვენ მოვუწოდებთ ქალაქ გამაგორის მცხოვრებლებს, არ მიირთვან ფუგუ,"- ნათქვამია ოფიციალურ განცხადებაში.
გამაგორის სუპერმარკეტში ფუგუს 5 შეკვრა გაიყიდა, რომელსაც ღვიძლი არ ჰქონდა ამოცლილი. როგორც ცნობილია, დელიკატესის ღვიძლი ადამიანის ორგანიზმისთვის საშიში და მომწამვლელია.
BBC-ის ინფორმაციით, იაპონიის ხელისუფლებამ გაყიდული ფუგუს 3 შეკვრა უკვე ამოიღო, 2-ს კი ჯერ კიდევ ეძებენ.
დელიკატესის მომზადება ძალიან რთულია და ამისათვის ლიცენზიაა საჭირო, რადგან მომზადების პროცესში პატარა შეცდომაც კი, შეიძლება ფატალური აღმოჩნდეს ადამიანისთვის.
