რუსეთმა საკუთარ მოქალაქეებს მოგზაურობისაგან თავის შეკავებისაკენ მოუწოდა, რადგან მათი თქმით აშშ მსოფლიოს გარშემო რუსების დასაკავებლად ნადირობს.
რუსეთის საგარეო საქმეთა სამინისტროს განცხადებაში ნათქვამია, რომ საზღვარგარეთ მყოფი რუსეთის მოქალაქეები აშშ-ის მიერ ამ ქვეყნებისათვის მათი დაკავების და ექსტრადირების მოთხოვნის საფრთხის ქვეშ არიან.
"თანამშრომლობის გაუმჯობესებისაკენ ჩვენი მოწოდებების მიუხედავად აშშ-ის სპეციალური უწყებები ეფექტურად აგრძელებენ მსოფლიოს გარშემო რუსებზე "ნადირობას". ამ პირობების გათვალისწინებით ჩვენ მოვუწოდებთ რუსეთის მოქალაქეებს ფრთხილად აწონ-დაწონონ საზღვარგარეთ გამგზავრების რისკები." ნათქვამია გაფრთხილებაში.
განცხადების მიხედვით 2017 წელს აშშ-მა სხვადასხვა ქვეყანაში 10 რუსეთის მოქალაქე დააკავა.
ესპანეთში, ლატვიაში და საბერძნეთში დაკავებულ პირებს ბრალად კიბერ-დანაშაული ედებათ.
განცხადება რუსეთის მოქალაქეებს იმის შესახებაც აფრთხილებს, რომ აშშ-ში ექსტრადირების შემთხვევაში მათ აშშ-ის სასამართლო მიკერძოებულად მოექცევა.
აშშ-ის სახელმწიფო დეპარტამენტში რუსეთის საგარეო საქმეთა სამინისტროს გაფრთხილებაზე კომენტარი ჯერ არ გაუკეთებიათ.