თბილისის საქალაქო სასამართლომ მეტროსადგურში ”თავისუფლების მოედანი” დაკავებული პირები ადმინისტრაციულ სამართალდამრღვევებად ცნო. სასამართლომ გიორგი სილაგაძეს 1000-ლარიანი ჯარიმა დააკისრა, ხოლო თეიმურაზ მენაბდიშვილს - 500. მათ ადმინისტრაციულ სამართალდარღვევათა კოდექსის 166-ე და 173-ე მუხლების დარღვევას ედავებოდნენ, რაც წვრილმან ხულიგნობას და პოლიციელის დაუმორჩილებლობას გულისხმობს.
"ადმინისტრაციული სამართალდარღვევის ოქმების თანახმად, ქ. თბილისის, მეტროსადგურ თავისუფლების მოედანზე გ.ს.-მ და თ.მ.-მ დაარღვიეს საზოგადოებრივი წესრიგი, კერძოდ, საზოგადოებრივი თავშეყრის ადგილას იგინებოდნენ, არ დაემორჩილნენ პოლიციის თანამშრომელთა კანონიერ მოთხოვნას და შეურაცხყოფა მიაყენეს პოლიციელებს.
სასამართლომ მხარეთა ახსნა-განმარტებების მოსმენის, მტკიცებულებათა, მათ შორის ვიდეო-ჩანაწერების გამოკვლევისა და შეფასების საფუძველზე დადასტურებულად მიიჩნია გ.ს. -ს და თ.მ.-ს მიერ საქართველოს ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული ადმინისტრაციული სამართალდარღვევის ჩადენის ფაქტი" - აცხადებს თბილისის საქალაქო სასამართლო.
მეტრო თავისუფლების მოედანზე პოლიციამ ორი პირი 28 იანვარს დააკავა. თვითმხილველებმა შემთხვევა გადაიღეს.
