არჩილ ტატუნაშვილის მკვლელობა

ილია II კირილს: გთხოვთ, გვიშუამდგომლოთ, რათა ტატუნაშვილის ცხედარი დაუბრუნდეს ოჯახს

საქართველოს საპატრიარქო

საქართველოს კათოლიკოს პატრიარქი რუსეთის პატრიარქს სთხოვს, იშუამდგომლოს შესაბამის ორგანოებთან, რათა ცხინვალში გარდაცვლილი არჩილ ტატუნაშვილის ცხედარი ოჯახს გადმოსცენ.

წერილში, რომელიც ილია II-ემ პატრიარქ კირილეს გაუგზავნა, წერია:

„მოგესალმებით ქრისტესმიერი ძმური სიყვარულით და მოგმართავთ რამდენიმე ხნის წინ ქ. ცხინვალში გარდაცვლილი არჩილ ტატუნაშვილის მშობლების თხოვნით.

ჩვენ ყველანი დიდად შეწუხებულნი ვართ იმ ფაქტით, რომ უკვე კვირაზე მეტია, რაც ამ ახალგაზრდის ცხედარი არ გადმოეცა განსვენებულის ოჯახს და მის მშობლებსა და ახლობლებს არა აქვთ საშუალება, დაკრძალონ იგი ქრისტიანული წესით, რაც კიდევ უფრო ამძაფრებს მათ მწუხარებას და მთელი საზოგადოების გულისტკივილსა და აღშფოთებას იწვევს.

ვიცით, რომ ამ საკითხის გადაწყვეტა არ შედის თქვენი უწმინდესობის კომპეტენიაში, მაგრამ გთხოვთ, გამოიყენოთ თქვენი მაღალი ავტორიტეტი და გვიშუამდგომლოთ შესაბამისი ორგანოების წინაშე, რათა არჩილ ტატუნაშვილის ცხედარი დროულად დაუბრუნდეს ოჯახს.

თქვენი მხრიდან ეს იქნება ნუგეში და დიდი დახმარება, როგორც გარდაცვლილის ახლობლებისთვის, ისე ჩვენთვის.“

არჩილ ტატუნაშვილი 2018 წლის 22 თებერვალს ლევან ქუტაშვილთან და იოსებ პავლიაშვილთან ერთად ოკუპირებული რეჟიმის წარმომადგენლებმა დააკავეს. მომდევნო დღეს კი ტატუნაშვილი ოკუპირებულ ქალაქ ცხინვალის საავადმყოფოში გარდაიცვალა. სუს-ის ცნობით, მას ცხინვალის საპატიმროში გადაყვანისას სცემეს. საქართველოს სახალხო დამცველმა კი თქვა, რომ ტატუნაშვილი ციხეში უკვე გარდაცვლილი მიიყვანეს. საოკუპაციო რეჟიმი ცხედრის გადმოცემაზე უარს ამბობს.

არჩილ ტატუნაშვილის მშობლები საპატრიარქოში ილია მეორეს პირველ მარტს შეხვდნენ.

კომენტარები