გარემოსდაცვითი ზედამხედველობის დეპარტამენტის ინფორმაციით, უწყების თანამშრომლებმა, ეროვნული სატყეო სააგენტოს თანამშრომლებთან ერთად, 2018 წლის 1 მარტიდან 31 მარტის ჩათვლით, ხე-ტყის უკანონო მოპოვებისა და ტრანსპორტირების 758 ფაქტი გამოავლინეს. უწყებაში აცხადებენ, რომ აქედან 31 ფაქტი სისხლის სამართლის დანაშაულების ნიშნებს შეიცავს.
ხე-ტყის უკანონო მოპოვებისა და ტრანსპორტირების ყველაზე მეტი ფაქტი კახეთში გამოვლინდა, ყველაზე ნაკლები კი გურიაში:
- კახეთი - 202
- შიდა ქართლი - 118
- ქვემო ქართლი - 115
- სამცხე-ჯავახეთი - 95
- იმერეთი - 66
- მცხეთა-მთიანეთი - 46
- სამეგრელო-ზემო სვანეთი - 45
- აჭარა - 34
- რაჭა-ლეჩხუმი და ქვემო სვანეთი - 24
- გურია - 13
უწყების ინფორმაციით, ჯამში, ამოღებულია უკანონოდ მოპოვებული 2572 მ³-მდე ხე-ტყე.
გარდა ამისა, გარემოსდაცვითი ზედამხედველობის მსახურში აცხადებენ, რომ ამავე პერიოდში, სახერხი საამქროს რეგლამენტის დარღვევის 78 ფაქტი დაფიქსირდა.
"ამოღებულია და ფინანსთა სამინისტროს მომსახურების სააგენტოშია გადატანილი 28 ერთეული დაურეგისტრირებელი სახერხი დანადგარი", - ამბობენ უწყებაში.
მათივე ინფორმაციით, მასალები შემდგომი რეაგირებისთვის, შესაბამის უწყებებშია გადაგზავნილი.