ქარის ელექტროსადგური

ქარის სადგურზე ენერგომოხმარების 0.6% მოდის, თუმცა მისი დენი იმპორტულზე ძვირია

0 კომენტარი
ფოტო: syncomedia.com

2018 წლის თებერვალში ქართლის ქარის ელექტროსადგურმა, რომლის ჯამური სიმძლავრე 20.7 მეგავატია, თვის განმავლობაში 6.2 გიგავატ საათი ელექტროენერგია გამოიმუშავა, რაც ქვეყანაში მთლიანი მიწოდების 0.6%-ს შეადგენდა.

მიწოდების ეს მაჩვენებელი 7%-ით აღემატება 2017 წლის ანალოგიურ პერიოდს, რაც სავარაუდოდ უკეთესი მეტეოროლოგიური პირობებით არის განპირობებული.

Galt & Taggart-ის მიმოხილვის მიხედვით, თებერვალში იმპორტული ელექტროენერგიის საშუალო ფასმა $5.3 ცენტი შეადგინა. ქართლის ქარის ელექტროსადგურთან საქართველოს მთავრობასა და ელექტროენერგიის კომერციულ ოპერატორს (ესკოს) შორის გაფორმებული 10-წლიანი კონტრაქტის მიხედვით, კი სახელმწიფო ამ სადგურის მიერ გამომუშავებულ კილოვატ საათს $6.89 ცენტად შეიძენს. ეს იმპორტული დენის ფასს $1.6 ცენტით, ანუ 3.8 თეთრით აღემატება.

2018 წლისთვის ამ სადგურის გამომუშავება 90 მილიონ კილოვატ საათზეა დაგეგმილი, შესაბამისად, მასში სახელმწიფო $6 მილიონს გადაიხდის. გამომუშავების ამ მოცულობის პირობებში, მომავალი 10 წლის განმავლობაში ელექტროსადგურის დენის შესყიდვაზე $60 მილიონი დაიხარჯება.

პროექტი $24-მილიონიანი შეღავათიანი კრედიტით EBRD-მა დააფინანსა. ქარის ელექტროსადგური შპს "ქართლის ქარის ელექტროსადგურს" ეკუთვნის, კომპანიის დამფუძნებელი სახელმწიფოა.

შიდა ქართლში უფრო მასშტაბური ქარის ელექტროსადგურის აშენებას თურქული კომპანია "ჩალიკ ენერჯი" გეგმავს. კერძო ინვესტიცია ამ შემთხვევაში $75 მილიონს შეადგენს და მისი მოცულობა 50 მეგავატი იქნება. ამ დროისთვის უცნობია თუ რა ფასად შეიძენს ახალი ქარის სადგურიდან სახელმწიფო ელექტროენერგიას.

ახალი ვიდეო მეტი ვიდეო

ბინის გაქურდვის დროს, თბილისში ერთი კაცი დააკავეს (ვიდეო)

კომენტარები