პარლამენტის თავმჯდომარის თქმით, ქართული ოცნების მთავრობა მაღალი ეკონომიკური ზრდის პირობებში სიღარიბის პრობლემას საბოლოდ აღმოფხვრის.
"საჭიროა, ქვეყნის ეკონომიკის სწრაფი განვითარება, იმისათვის, რომ მივაღწიოთ მთავარ მიზანს - ეს არის სიღარიბის საბოლოოდ აღმოფხვრა ჩვენს ქვეყანაში. მაღალი ეკონომიკური ზრდის პირობებში ჩვენ დაგვჭირდება რამდენიმე წელიწადი იმისათვის, რომ საბოლოოდ აღმოიფხვრას სიღარიბე", - ამბობს ირაკლი კობახიძე.
მსოფლიო ბანკის შეფასებით, საქართველოში მოსახლეობის 69% ითვლება ღარიბად. მათგან 32% უკიდურესად, ხოლო 37% კი საშუალოდ ღარიბია. უკიდურესი სიღარიბის მაჩვენებელი 2010 წლის შემდგომ დაახლოებით 15%-ით შემცირდა.
რაც შეეხება სიღარიბის ეროვნულ სტატისტიკას, მისი მიხედვით, მოსახლეობის 21.3%-ია უკიდურესად ღარიბი.
საქსტატის მონაცემებით, სიღარიბის სწრაფი შემცირება ქვეყანაში მაღალი ეკონომიკური ზრდის პერიოდს ემთხვევა.
საქართველოს ეკონომიკური ზრდა 2010 წლიდან მოყოლებული საშუალოდ 6.1%-ს შეადგენდა, თუმცა, 2013 წლიდან მისი ტემპი დამუხრუჭდა და დაგეგმილი 6%-ის ნაცვლად 3.3% შეადგინა. 2014 წელს მთავრობას 5%-იანი ეკონომიკური ზრდა ჰქონდა დაგეგმილი, თუმცა, ეკონომიკური მაჩვენებლების გაუარესების გამო, მან 0.4%-ით ნაკლები შეადგინა. 2015 წელს კი, ეკონომიკური ზრდა 2.8% იყო, რაც მთავრობის გეგმას 0.8%-ით ჩამორჩებოდა.2016 წელს საქართველოს ეკონომიკურმა ზრდამ 2.7% შეადგინა, მთავრობა 2.7%-იანი ზრდის მიღწევას გეგმავდა. 2017 წელს კი 4%-იანი ზრდა იყო დაგეგმილი, თუმცა მისმა ტემპმა 5% შეადგინა.
