კვირიკაშვილი: მნიშვნელოვანია, რომ ქვეყანას ჭარბვალიანობით რყევა არ დაემუქროს

"ჩვენთვის ძალიან მნიშვნელოვანია, რომ განვითარების ის დინამიკა, რომელიც შექმნილია ჩვენს ქვეყანაში და გამოხატულია ეკონომიკური ზრდის მაღალ მაჩვენებლებში, იყოს მდგრადი და საქართველოს ჭარბვალიანობით გამოწვეული არანაირი რყევა არ დაემუქროს", - ამბობს პრემიერმინისტრი იმ საკანონმდებლო პაკეტზე, რომელიც ქვეყანაში სესხებს ახალ რეგულაციებს უწესებს.

საქართველოს ფინანსთა სამინისტრო და ეროვნული ბანკი ქვეყნის საკრედიტო ბაზრის რეფორმირებას გეგმავენ. 7 მაისიდან უკვე ძალაში შევიდა ეროვნული ბანკის პრეზიდენტის ბრძანება, რომლის შედეგადაც კომერციულ ბანკებს მომხმარებელთა გადახდისუნარიანობის ადეკვატური შეფასების გარეშე სესხების გაცემაზე ლიმიტები დაუწესდათ. ამავდროულად, იგეგმება ახალი ნორმის მიღება, რომელიც მოსახლეობას ლომბარდებში ავტომობილებისა და უძრავი ქონების ჩადებას აუკრძალავს. კიდევ ერთი ცვლილებით კი ქვეყანაში სესხების განაკვეთზე წესდება ახალი ჭერი 50%-ის ოდენობით. შესაბამისად იკრძალება იმ სესხების გაცემა, რომელთა ეფექტური საპროცენტო განაკვეთიც 50%-ზე მაღალია. 

საკრედიტო ბაზარზე პრაქტიკულად ერთადერთი პროდუქტი, რომლის საპროცენტო განაკვეთიც დაახლოებით 100%-ია არის ონლაინსესხი. თითქმის ყველა ონლაინ გამსესხებლის განაკვეთი 80-95%-ის ფარგლებში მერყეობს. 

პირველი ვიცეპრემიერისა და ეკონომიკის მინისტრის დიმიტრი ქუმსიშვილის თქმით, ამ ცვლილებას ისევე როგორც "ონლაინსესხებთან ბრძოლის" პირველ ტალღას მომხმარებელთა შავ ბაზარზე გადასვლა არ მოჰყვება. ქუმსიშვილის თქმით, სასესხო ბაზარი რეგულირებადია და სახელმწიფომ მისი მოქალაქეების დაცულობა უნდა უზრუნველყოს.

კიდევ ერთი ინიციატვა ლომბარდებს შეეხება, სახელმწიფო გეგმავს მომხმარებლებს საკუთარი უძრავი ქონებისა და ავტომობილების სალომბარდე იპოთეკით დატვირტვა აუკრძალოს. 

ცვლილებათა პაკეტის ნაწილია შემოსავლების ჯგუფების მიხედვით, სესხის ყოველთვიური მომსახურების ტვირთის ლიმიტების განსაზღვრა. ეროვნული ბანკის პროექტის მიხედვით, განსაზღვრულია 7 საშემოსავლო საფეხური. 

7 საშემოსავლო საფეხური, ეროვნული ბანკის მიხედვით ასე გამოიყურება:

1. თვეში 500 ლარამდე - ყოველთვიური სასესხო ტვირთი შემოსავლის მაქსიმუმ 15%, ანუ 75 ლარამდე;
2. თვეში 500-1,000 ლარამდე - ყოველთვიური სასესხო ტვირთი შემოსავლის მაქსიმუმ 20%, ანუ 200 ლარამდე;
3. თვეში 1,000-2,000 ლარამდე - ყოველთვიური სასესხო ტვირთი შემოსავლის მაქსიმუმ 25%, ანუ 500 ლარამდე;
4. თვეში 2,000-4,000 ლარამდე - ყოველთვიური სასესხო ტვირთი შემოსავლის მაქსიმუმ 30%, ანუ 1,200 ლარამდე;
5. თვეში 4,000-8,000 ლარამდე - ყოველთვიური სასესხო ტვირთი შემოსავლის მაქსიმუმ 35%, ანუ 2,800 ლარამდე;
6. თვეში 8,000-16,000 ლარამდე - ყოველთვიური სასესხო ტვირთი შემოსავლის მაქსიმუმ 40%, ანუ 6,400 ლარამდე;
7. თვეში 16,000 ლარზე მეტი - ყოველთვიური სასესხო ტვირთი შემოსავლის მაქსიმუმ 50%, ანუ 8,000 ლარამდე.

ახალი წესი ნიშნავს, რომ თუ თქვენი ხელფასია 500 ლარი თქვენ ვერ შეძლებთ ერთი წლით აიღოთ 1000 ლარიანი სესხი. რადგანაც ამ შემთხვევაში ყოველთვიური სასესხო ტვირთი 75 ლარს ანუ ყოველთვიური ხელფასის 15%-ს აღემატება. დავუშვათ რომ ისევ 500 ლარია თქვენი შემოსავალი და გადაწყვიტეთ აიღოთ ერთწლიანი საგანვადებო სესხი 700 ლარის ოდენობით ახალი ტელეფონის შესაძენად. ამ ერთი წლის განმავლობაში თქვენ გაუთვალისწინებელი ხარჯი დაგიდგათ, რისთვისაც ახალი სესხის აღება გესაჭიროებათ. თუმცა იმის გამო, რომ ლიმიტი შევსებული გაქვთ საკრედიტო დაწესებულებები ფულს ვეღარ მოგცემენ.