პარლამენტის დროებითმა საგამოძიებო კომისიამ, რომელიც ხორავას ქუჩაზე 1-ლ დეკემბერს მომხდარი არასრულწლოვნების მკვლელობის საკითხს შეისწავლის, საქმის პროკურორის, ზვიად ფხაკაძის და შსს-ის წარმომადგენლის, კახა სირაძის დაკითხვა განაახლა.
ევროპული საქართველოს წევრის, ირაკლი აბესაძის კითხვები, რომელიც ორივე მათგანს მიემართებოდა, ჩატარებული გამოძიების მიმდინარეობისას მოწმეთა დაკითხვას და მათგან ინფორმაციის მიღებას შეეხებოდა. აბესაძეს აინტერესებდა, ჩატარდა თუ არა დანაშაულის მოწმეთა ტელეფონების შესწავლა და ინფორმაციის ამ ფორმით მიღება, ძალოვანი უწყებების წარმომადგენლები მას პასუხობდნენ, რომ "ამას შესაბამისი პროცედურები აქვს".
კითხვების უმეტეს ნაწილზე მათ კონკრეტული პასუხები არ გაუციათ.
აბესაძემ თავდაპირველად კახა სირაძეს ჰკითხა, შეხვედრია თუ არა საქმის მასალებში, რომ გამომძიებელმა შესთავაზა რომელიმე მოწმეს, რომ დაათვალიერებდა მის ტელეფონს და ნახავდა მის მიმოწერას, 1-ლ დეკემბერს, 2 დეკემბერს და შემდგომ დღეებში, ვიდრე ის გამოსაკითხად იქნებოდა მიყვანილი საგამოძიებო ორგანოში.
სირაძემ უპასუხა, რომ ეს კანონსაწინააღმდეგო არ იქნებოდა, თუმცა, კითხვაზე, გაკეთდა თუ არა ასეთი შეთავაზება, კონკრეტული პასუხი არ გასცა.
ამის შემდეგ აბესაძემ კითხვა პროკურორს, ზვიად ფხაკაძეს დაუსვა:
ირაკლი აბესაძე: ბატონო ზვიად, თქვენ ხომ არ გაქვთ ინფორმაცია, რომ რომელიმე მოწმემ გამომძიებელს ნებაყოფლობით დაათვალიერებინა საკუთარი ტელეფონი ან საკუთარი კომპიუტერული ტექნიკა?
ზვიად ფხაკაძე: ინფორმაცია მაქვს საქმის მასალებიდან გამომდინარე, ტელეფონი იქნა თუ კომპიუტერული ტექნიკა, ოპერატიული კუთხით დამუშავებული იქნა ყველაფერი. რაც შეეხება ტელეფონიდან ინფორმაციის გამოთხოვას და მათ საქმის მასალებში დამაგრებას, ამას სათანადო წესი აქვს, ეს უნდა მოხდეს გამოთხოვის წესით.
ირაკლი აბესაძე: ანუ ნებაყოფლობით რომ თვითონ შეეთავაზებინათ, ასეთი შემთხვევა არ ყოფილა, იმიტომ რომ საქმის მასალებში ასეთი არ იყო.
ზვიად ფხაკაძე: ეს თქვენი შეფასებაა.
ირაკლი აბესაძე: ნებისმიერი მოწმე მოდის თქვენთან და არ გაწვდით სათანადო ინფორმაციას მომხდარი ჩხუბის შესახებ, სადაც ის ეზოში იმყოფება, თქვენ და თქვეს მინისტრს რჩება შთაბეჭდილება თქვენი მოხსენებიდან გამომდინარე, (პიროვნულად თქვენ არ გგულისხმობთ, ზოგადად შსს-ის თანამშრომლებს), რომ ადამიანები არ გაწვდიან სრულად ინფორმაციას, რაც მათ შესაძლებელია ან უნდა იცოდნენ. აქედან გამომდინარე, მიჩნდება მარტივი შეკითხვა, ხომ არ შესთავაზეთ რომელიმე მათგანს, ნებაყოფლობით წარმოგვიდგინეთ თქვენი ტელეფონი, რომელიც ხელში გიჭირავთ, ჩვენ მას დავათვალიერებთ, თუ გამოძიებისთვის რამე საინტერესო ინფორმაციას შეიცავს, ამას დავაფიქსირებთ და ტელეფონს დაგიბრუნებთ. ეს არის შესაძლებელი მესაკუთრის თანხმობით ჩასატარებელი მოქმედება, იყო თუ არა ასეთი შეთავაზება.
კახა სირაძე: ასეთ რამეს შესაბამისი პროცედურები აქვს, თუ ეს პროცედურები ჩატარებულია, იქნება საქმის მასალებში.
ირაკლი აბესაძე: არ არის. ფარული მიყურადება არც ერთი ამ მოწმის მიმართ არ ჩატარებულა.
ზვიად ფხაკაძე: ვადასტურებ, რომ არ განხორციელებულა.
ირაკლი აბესაძე: ტელეფონები დაუტოვეთ მათ (მოწმეებს) იმიტომ, რომ მათ კომუნიკაციის გაგრძელება შეძლონ, თუმცა, ამ ტელეფონების მოსმენას, რისი შესაძლებლობაც ნამდვილად აქვს სახელმწიფოს, არ ვახორციელებთ და ვაძლევთ საშუალებას, რომ ისევ ჩვენგან ფარულად და ჩვენთვის მიუწვდომელი არხებით ჰქონდეთ ერთმანეთთან კომუნიკაცია.
ზვიად ფხაკაძე: ჩვენ არასრულწლოვნის ტელეფონზე რომ ჩაგვეტარებინა ფარული მიყურადება და მოსმენა, სასამართლოს ამის ძალიან სტანდარტი აქვს დაწესებული, განსაკუთრებით ბოლო წლებში.
ირაკლი აბესაძე: ანუ არის ჩადენილი განსაკუთრებით მძიმე დანაშაული, ორი არასრულწლოვანია მოკლული, ინფორმაცია არ არსებობს, გვაქვს ოპერატიული ინფორმაცია, მოსაზრება, რომ არასრულწლოვნებმა შეიძლება ტელეფონით გაცვალონ ინფორმაცია ამ საკითხზე, თქვენ თვლით, რომ სასამართლო და ჩვენი კანონმდებლობა არ იძლევა იმის საშუალებას, რომ განგეხორციელებინათ მათი ფარული მიყურადება იმისთვის, რომ გაგეხსნათ განსაკუთრებული სისასტიკით ჩადენილი დანაშაული?
ზვიად ფხაკაძე: ის, რომ განსაკუთრებით მძიმე კატეგორიის დანაშაულთან გვქონდა საქმე, არ არის საკმარისი, რომ სასამართლომ მიიღოს გადაწყვეტილება ამ ფარული საგამოძიებო მოქმედების ჩატარებასთან დაკავშირებით. კონკრეტული პირის მიმართ მხოლოდ ოპერატიული პატაკი, მისი დაკითხვა არ არის საკმარისი, რომ მის სატელეფონო ნომერზე განხორციელდეს საგამოძიებო მოქმედება. ვინაიდან ეს სტანდარტი არ გვქონდა და შეკრებილი მტკიცებულებები კონკრეტულ პირზე არ იძლეოდა საკმარის მონაცემებს, მივიღეთ გადაწყვეტილება, ტელეფონით გადაცემული ინფორმაციის შემდგომ გამოთხოვა. ესეც ფარული საგამოძიებო მოქმედებაა. ეს არის კანონი, რომელსაც ჩვენ ვემორჩილებით, ეს არის საპროცესო კოდექსი.
ირაკლი აბესაძე: მოწმეთა დიდი ნაწილი თავად გეუბნებათ იმ ტელეფონის ნომერს, რომლითაც სარგებლობს. თუ თქვენ ჩათვლიდით საჭიროდ, რომ პირველივე ეტაპიდან განგეხორციელებინათ ამ ადამიანების ტელეფონებზე მიყურადება და გაგეგოთ, რაზე საუბრობდნენ ისინი მომხდარი დანაშაულის ჩადენის შემდგომ, ეს იყო აბსოლუტურად შესაძლებელი.
ახლა რატომ იყო არასწორი თქვენი გადაწყვეტილება, არ ჩაგეტარებინათ ამ ადამიანების მიმართ ფარული საგამოძიებო მოქმედება: ტელეფონები ამოიღეთ საკმაოდ გვიან: 16, 17, 21 დეკემბერი.
16 დეკემბერს, ერთ-ერთი მთავარი ფიგურანტი, რომლის მხრიდანაც მიყვანილი მეგობრები აღმოჩნდნენ დღეს უკვე მსჯავრდებულები ჩადენილ მკვლელობაში, ა.ს (ის თქვენ პირველ დეკემბერს უკვე დაკითხული გყავდათ), გაწვდით ტელეფონს და გეუბნებათ, რომ ამ პერიოდში მან უკვე გამოცვალა სიმბარათი და რამდენჯერმე გადააყენა ოპერაციული სისტემა. თავიდან რომ მოგენდომებინათ, გექნებოდათ ინფორმაცია, მაგრამ როცა მოინდომეთ, ამ ადამიანს ეს ინფორმაცია უკვე წაშლილი ჰქონდა.
იყო ეს ასე თუ არა და იყო თუ არა შეცდომა, რომ ვერ შეძელით ამ ადამიანისგან ინფორმაციის მიღება.
კახა სირაძე: ეს მოქმედება არის თუ არა შეცდომა? ყველა მოქმედება ხო ვერ ჩაითვლება შეცდომად, შედეგზეა დამოკიდებული. თქვენ მიგაჩნიათ, რომ დაიკარგა და საქმეს დააკლდა ძალიან დიდ რაღაცა, ხო? მე ვერ ვიტყოდი, რომ ამით რაღაცა გაფუჭდა.
ირაკლი აბესაძე: შსს-მ დ.ღ დაკითხა 14 დეკემბერს. ბატონო ზვიად, ვკითხულობ ციტატას დ.ღ-ს ჩვენებიდან თქვენს გასაგონად, თქვენ უკარნახეთ ბატონ კახას, მე მგონი მას ტელეფონი არ ჰქონდაო. მე გითხარით, დ.ღ-ს ჩვენება იყო მნიშვნელოვანი და თქვენ მითხარით, დ.ღ-ს ტელეფონი არ ჰქონდაო.
"მოგვიანებით ისევ ტელევიზიის საშუალებით გავიგე, რომ გარდაცვლილი ყოფილა ჩემი პარალელური კლასელი, ლევან დადუნაშვილი, რომელსაც მიაყენეს ჭრილობა. ამ პერიოდში დამირეკა დედაჩემმა ჩემს ნომერზე (კონკრეტული ნომერია მითითებული) და მითხრა, სასწრაფოდ მივსულიყავი სახლში". თქვენ მეუბნებით, ტელეფონი არ ჰქონდაო და საქმის მასალებში დევს ჩვენება, სადაც ის ამბობს, რომ დედამ დაურეკა.
კახა სირაძე: დ.ღ-ს გამომძიებელთან ტელეფონი არ ჰქონდა.
ირაკლი აბესაძე: რა ღონისძიებები გაატარეთ დ.ღ-ს ტელეფონის მოსაპოვებლად? დ.ღ-ს ჩხრეკა არ ჩატარებულა. გარდა იმისა, რომ თქვენ დანა არ მოძებნეთ მის სახლში, როცა გქონდათ ინფორმაცია მის სახლში დანის არსებობის შესახებ, გაუშვით საგამოძიებო ჯგუფი ჩხრეკაზე, არც კომპიუტერული ტექნიკა ამოიღეთ, მხოლოდ და მხოლოდ ტანსაცმლის ამოღებით კმაყოფილდებით და გამოხიდართ სახლიდან. ამას ასახავს ოქმი. რა ღონისძიებები გაატარეთ, რომ მას პირველ დღეს ტელეფონი რომ ჰქონდა, მოგეპოვებინათ?
