საქართველოს მეცხრე მოწვევის პარლამენტის ყველაზე გამცდენი წევრი ერთიანი ნაციონალური მოძრაობის კობა ნაყოფიაა. საერთაშორისო გამჭვირვალობა საქართველოს მიერ 2016 წლის საპარლამენტო არჩევნებიდან 2017 წლის ჩათვლით შესწავლილი დოკუმენტების მიხედვით, ნაყოფიამ პლენარული სხდომა 62-ჯერ გააცდინა.
ნაყოფია ასევე პირველია საკომიტეტო მოსმენების გაცდენების რაოდენობითაც, მან სხდომა 73-ჯერ გააცდინა. პარლამენტის ვებგვერდის მიხედვით, ის განათლების მეცნიერებისა და კულტურის კომიტეტის წევრია.
ნაყოფია წინა მოწვევის პარლამენტშიც გაცდენების ლიდერი იყო. 2012-2016 წლებში მან საკომიტეტო განხილვა 172-ჯერ გააცდინა.
პლენარული სხდომების გაცდენების მიხედვით, მეორე ადგილზე ასევე ენმ-ის წევრი ნიკა მელიაა, მან სხდომა 58-ჯერ გააცდინა, მესამე ადგილზეც ენმ-ის წევრია. აზერ სულეიმანოვმა სხდომა 56-ჯერ გააცდინა.
მთლიანობაში, მეცხრე მოწვევის პარლამენტში პლენარული სხდომების საპატიო მიზეზით გაცდენის 2119 შემთხვევა დაფიქსირდა, აქედან ოჯახური მდგომარეობის მითითებით იყო 1430 შემთხვევა, რაც საპატიო მიზეზით გაცდენილი შემთხვევების 68% უდრის.
