თბილისის მერის ინფორმაციით, გავრცელებული ინფორმაცია იმის შესახებ, რომ მერია დიღმის ტყე-პარკში მშენებლობას აპირებს, ტყუილია. კახა კალაძის თქმით, ტერიტორიაზე არსებული „კია მოტორსის“ ავტოსალონების ნაცვლად, რომელიც კომპანია „ანაგის“ საკუთრებაა, მრავალფუნქციური კომპლექსი - "ორანჟერეა" მოეწყობა.
"ერთ-ერთი ტელეკომპანიის ეთერში გავიდა სიუჟეტი, თითქოს დედაქალაქის მთავრობა და მერი, დიღმის ტყე-პარკში მშენებლობის განხორციელებას აპირებს. პირდაპირ შემიძლია ვუთხრა მოსახლეობას, რომ ეს ძალიან დიდი შეცდომა და ტყუილია. ერთ-ერთი არასამთავრობო ორგანიზაციის ინფორმაციით, რომელიც "ნაციონალური მოძრაობის" ნაწილია, საუბარი იყო იმაზეც, რომ ჩვენ ზონის სტატუსი შევუცვალეთ არსებულ კონკრეტულ მიწის ნაკვეთს, სადაც დღეს "კიას" ცენტრი მდებარეობს, რაც სრული სიცრუეა. ჩვენი მხრიდან, არანაირი ზონის ცვლილება არ განხორციელებულა", - თქვა კახა კალაძემ.
თბილისის მერმა დედაქალაქის მთავრობის სხდომაზე აღნიშნული ტერიტორიის 2009 და 2011 წლების ზონალური რუკები წარადგინა. მისი თქმით, ტერიტორიას, რომელზეც დღეს "კიას" ცენტრი მდებარეობს, 2011 წლიდან საზოგადოებრივი საქმიანობის ზონის სტატუსი აქვს მინიჭებული.
"2011 წელს, ხელისუფლებაში "ნაციონალური მოძრაობა" იყო. "კიას" ცენტრი ამ მონაკვეთში მდებარეობს. ეს კომპანია "ანაგის" საკუთრებაა, რომელმაც მიიღო გადაწყვეტილება, რომ აღნიშნული შენობის ნაცვლად, იგივე მოცულობის, თანამედროვე ტიპის შენობა-ნაგებობა - საგამოფენო "ორანჟერეა" ააშენონ. პროექტი დამტკიცებული ჯერ კიდევ არ არის, მუშაობა მიმდინარეობს და საბოლოო პროექტთან დაკავშირებით, საზოგადოებას დეტალებს ვაცნობებთ", - აღნიშნა თბილისის მერმა.
კახა კალაძე აღნიშნავს, რომ დედაქალაქის მთავრობის ერთ-ერთი მთავარი პრიორიტეტი მწვანე სივრცეების მოვლა-პატრონობა და ახლის შექმნაა.
"ჩვენმა ოპონენტებმა გენგეგმას ვერანაირი ხარვეზი ვერ უპოვეს და ყველანაირად ცდილობენ, რომ ყოველგვარი სიცრუით, ზიანი მიაყენონ დოკუმენტს, რომელიც თბილისის საკრებულოშია გადაგზავნილი. სწორედ ჩვენი დავალებით, დაიწყო მუშაობა დიღმის ტყე-პარკთან დაკავშირებით. სამწუხაროდ, აღნიშნულ ტერიტორიაზე მიწის ნაკვეთები კერძო საკუთრებაშია, გაყიდულია. ამიტომ, დავიწყეთ ამ ადამიანებთან კომუნიკაცია, რათა მოხდეს ნაკვეთების გამოსყიდვა, ადგილმონაცვლეობა იმისთვის, რომ რომ ადგილობრივი მოსახლეობისთვის მწვანე სივრცეები შევქმნათ", - განაცხადა თბილისის მერმა.
თბილისის მერიის ინფორმაციით, მიმდინარე წლის 20 ივნისს, თბილისის არქიტექტურის სამსახურის მიერ, დიღმის ტყე-პარკის მომიჯნავედ არსებულ შპს "ანაგის" საკუთრებაში არსებულ ტერიტორიაზე, მიწის ნაკვეთის სამშენებლოდ გამოყენების პირობები შეთანხმდა. შეთანხმება ნაკვეთზე, სადაც ამჟამად, "კიას" ავტოსალონი და ავტომომსახურების ცენტრი ფუნქციონირებს, მრავალფუნქციური კომპლექსის - "ორანჟერეის" მოწყობას ითვალისწინებს.
მერიაში აღნიშნავენ, რომ წარმოდგენილი დოკუმენტაციის მიხედვით, კომპანიას განზრახული აქვს ავტოტექმომსახურების ცენტრი, რომელიც საქმიანობის სპეციფიკიდან გამომდინარე, გარემოზე მავნე ზემოქმედებას ახდენს, ისეთი ფუნქციისა და იერსახის შენობით ჩაანაცვლოს, რომელიც დიღმის ტყე-პარკის სამომავლო განვითარების კონცეფციაში ორგანულად ჩაეწერება და მასთან ერთად, არეალის საზოგადოებრივ-საპარკე ინფრასტრუქტურის განვითარებას უზრუნველყოფს.
„ორანჟერეა თავისი ფუნქციით საგამოფენო, საკონცერტო და სადღესასწაულო ცენტრი იქნება. საპროექტო კომპანია ამჟამად, კონკრეტულ პროექტს ამუშავებს, რომლის მიხედვითაც, მსუბუქი კონსტრუქციის შენობა ენერგოეფექტური მასალებით აიგება და ორიგინალური არქიტექტურული გადაწყვეტით, გარე და შიდა მწვანე სივრცეების ერთიანობას უზრუნველყოფს", - აცხადებენ თბილისის მერიაში.
