პენიტენციური სამსახურის ინფორმაციით, ვანო მერაბიშვილის ჯანმრთელობის მდგომარეობა ბოლო ორი კვირის განმავლობაში "საგრძნობლად გაუმჯობესდა". აღსანიშნავია, რომ ვანო მერაბიშვილი ამ დილით ე.წ მატროსოვის ციხიდან კლინიკა მედიქლაბში გადაიყვანეს. ადვოკატები ამბობენ, რომ ყოფილი პრემიერის დიაგნოზი დღემდე დადგენილი არ არის და შესაბამისად მკურნალობაც არ უტარდება.
"2018 წლის 26 სექტემბერს კლინიკაში „ავერსი“ ჩატარებულმა გამოკვლევებმა აჩვენა, რომ ჩატარებული მკურნალობის შედეგად, ჰორნერის სინდრომის დაავადება რეგრესირებს და, როგორც მსჯავრდებული ექიმებთან თავადვე ადასტურებს, 2 კვირაა, რაც მისი მდგომარეობა საგრძნობლად გაუმჯობესდა, როგორც სუნთქვის პრობლემების, ასევე თვალის ლორწოვანის ჰიპერემიისა და ქუთუთოს შეშუპების მხრივ. საზოგადოებას შევახსენებთ, რომ 26 სექტემბერსა და მანამდე ჩატარებული მრავალი კონსულტაციისა და სხვადასხვა სამოქალაქო კლინიკაში მაღალტექნოლოგიური კვლევების შედეგად, სრულად გამოირიცხა ორგანიზმში სიმსივნური პროცესი, რაც ზოგჯერ ჰორნერის სინდრომის ერთ-ერთ მიზეზად ვლინდება, ასევე გამოირიცხა ჰორნერის სინდრომის ისეთი მიზეზები, როგორიცაა ფარისებრი ჯირკვლის, გულ-სისხლძარღვთა პრობლემები და სხვა. მედიკოსთა აზრით, სახეზე არც ინტოქსიკაცია არ არის და პაციენტი ამ მხრივ არავითარ დამატებით კვლევას არ საჭიროებს. სხვადასხვა სამოქალაქო კლინიკის ყველა ექიმის საერთო აზრით, მსჯავრდებულს მხოლოდ სჭირდება, არ შეწყვიტოს ის მკურნალობა, რაც დაენიშნა, რაზეც სამედიცინო პერსონალი დაკვირვებას აგრძელებს. თუმცა, მიუხედავად იმისა, რომ დანიშნული მკურნალობის შედეგად დაავადება და სიმპტომები რეგრესირებს და ექიმები დამატებით ანალიზებს საჭიროდ არ თვლიან, სპეციალურმა პენიტენციურმა სამსახურმა მიიღო გადაწყვეტილება მსჯავრდებულის ადვოკატების მხრიდან გამოთქმული ბოლო ეჭვის გაბათილების მიზნით, რომელიც ინტოქსიკაციას უკავშირდება, ვანო მერაბიშვილის კლინიკაში „მედიქლაბი“ გადაყვანის შესახებ. მას დღეს და ხვალ ჩაუტარდება ტოქსიკოლოგის კონსულტაცია, მოხდება იმ მძიმე მეტალების იდენტიფიკაცია, რომელზეც მედიკოსთან აზრით მიზანშეწონილია ანალიზების ჩატარება, როგორც საქართველოში ისე საზღვარგარეთ. შედეგად, საბოლოოდ, დოკუმენტურად გამოირიცხება ის ეჭვიც, რომელიც ამ ეტაპზე მხოლოდ მსჯავრდებულის ადვოკატებს აქვთ." - წერია პენიტენციური სამსახურის განცხადებაში.
23 სექტემბერს ვანო მერაბიშვილის ადვოკატებმა ყოფილი პრემიერმინისტრის ჯანმრთელობის მდგომარეობის გაუარესებაზე ისაუბრეს და არ გამორიცხეს მერაბიშვილის მიზანმიმართული ინტოქსიკაცია. საპასუხოდ, სპეციალურმა პენიტენციურმა სამსახურმა გაავრცელა განცხადება, სადაც მერაბიშვილის ჯანმრთელობის გაუარესების შესახებ ინფორმაციას სიცრუეს უწოდებდნენ. განცხადებაში ჩამოთვლილი იყო მსჯავრდებულის მიმართ ჩატარებული გამოკვლევები და მისი დიაგნოზები.
დღეს ადვოკატები ამბობდნენ, რომ მათ ავერსის კლინიკაში ჩატარებული წინა გამოკვლებების პასუხები ამ დრომდე არ მიუღიათ, მათ აქვთ ეჭვი, რომ შესაძლოა ხდებოდეს შედეგების ფალსიფიკაცია.
