არასამთავრობო ორგანიზაცია "ადამიანის უფლებათა ცენტრის" ინფორმაცით, გორში, თითქმის ყველა საარჩევნო უბანთან "ქართული ოცნების" აგიტატორები არიან მობილიზებულები. hridc-ის ინფორმაციით, მათ რამდენიმე უბანზე მმართველი პარტიის მიერ მხარდაჭერილი კანდიდატის, სალომე ზურაბიშვილის საარჩევნო ნომერიც გააკრეს.
ორგანიზაცია ტირძნისის 62-ე საარჩევნო უბანზე გაკრული სალომე ზურაბიშვილის მხარდამჭერი პოსტერების ფოტოსაც ავრცელებს.
"ადამიანის უფლებათა ცენტრი" სხვა დარღვევებზეც საუბრობს.
"სადემონსტრაციო ოქმები არ იყო ან არასწორად იყო შევსებული ფხვენისის 74- ე უბანზე და ტირძნისის 62-ე უბანზე. ტირძნისის 92-ე უბანზე ერთის ნაცვლად ორი ბიულეტენი გასცა რეგისტრატორმა და ამომრჩეველმა ორივე ბიულეტენი განათავსა კონვერტში, რის გამოც რეგისტრატორმა ახსნა-განმარტება დაწერა. დაახლოებით 12 საათისთვის, ხმაური იყო გორის 96-ე საარჩევნო უბანზე. ხმაური ხმის მისაცემად მისულმა ამომრჩეველმა გამოიწვია, რომელიც სიაში არ აღმოჩნდა. საარჩევნო უბანზე საპატრულო პოლიციის გამოძახება გახდა საჭირო", - აღნიშნულია ორგანიზაციის განცხადებაში.
გარდა ამისა, "ადამიანის უფლებათა ცენტრის" დამკვირვებლების ინფორმაციით, საარჩევნო უბნებზე არიან წარმომადგენლები სადამკვირვებლო ორგანიზაცია "ადვოკატთა და იურისტთა საერთაშორისო ობსერვატორიადან", რომლებიც ეწევიან აგიტაციას და ამომრჩევლებს სალომე ზურაბიშვილის მხარდაჭერისკენ მოუწოდებენ.
