ამერიკელი რეპერი სნუპ დოგი, მზად არის აიყვანოს პატრონის მიერ ქუჩაში დატოვებული, უსაყვარლესი ბულტერიერი, სახელად სნუპი.
ძაღლი 17 დეკემბერს ინგლისის ერთ-ერთ ქალაქში პატრონმა საწოლიანად დატოვა.
ქუჩის კამერების მიერ გადაღებულ კადრებზე, რომელიც RSPCA-მ გაავრცელა, ბულტერიერი მანქანის კარებს ახტება, მას შემდეგ, რაც პატრონმა ის თავის საწოლთან ერთად ქუჩაში დატოვა.
კადრებში ჩანს, რომ ძაღლი მაშინაც არ ნებდება, როდესაც პატრონი მანქანას ძრავს.
დაახლოებით 1 საათში, გამვლელმა ძაღლი იპოვა, ის თავის საწოლში იწვა. გამვლელმა მის შესახებ RSPCA-ს (ორგანიზაცია, რომელიც ცხოველთა უფლებებს იცავს) შეატყობინა და აღნიშულ ფაქტზე გამოძიება დაიწყო.
ძაღლი ცხოველთა თავშესაფარში წაიყვანეს. ვეტერინარულ კლინიკაში მას სნუპი დაარქვეს, ის დაახლოებით 2 წლისაა.
47 წლის რეპერმა Daily star-თან მიცემულ ინტერვიუში თქვა, რომ ამ ვიდეომ გული გაუტეხა.
"მისთვის ყოველთვის მოიძებნება ადგილი ჩემ სახლში",- ამბობს რეპერი.
სნუპი ახლა თავშესაფარში ცხოვრობს, სადაც ამბობენ, რომ მას ადამიანებთან თამაში და ჩახუტება უყვარს.
"მასზე ზრუნვის სურვილი ძალიან ბევრმა გამოთქვა, ამიტომ ვფიქრობთ, სნუპი ძალიან მალე იქნება ახალ სახლში",- ამბობენ თავშესაფარში.
