აშშ-ის ალაბამას შტატში გუშინ სულ მცირე 2 ტორნადო დაფიქსირდა, რამაც შტატის მასშტაბით კატასტროფული ზარალი გამოიწვია. დაღუპულია 23 ადამიანი, მათ შორის ბავშვები.
განადგურდა ათეულობით სახლი. ადგილობრივი სამართალდამცველების თქმით ზოგიერთ ადგილას შეღწევას ჯერ-ჯერობით ვერ ახერხებენ და შესაძლოა დაღუპულთა რიცხვი გაიზარდოს.
აშშ-ის პრეზიდენტმა დონალდ ტრამპმა დაღუპულების ოჯახებს ტვიტერზე მიუსამძიმრა:
"ალაბამას და მიმდებარე ტერიტორიების შესანიშნავ ხალხს: გთხოვთ, თავს გაუფრთხილდით. ტორნადოები და შტორმები ნამდვილად ძალიან საშიშია და შესაძლოა მეტიც გამოჩნდეს. დაღუპულების ოჯახებს და მეგობრებს, ასევე დაშავებულებს: ღმერთი დაგლოცავთ ყველას!"
ალაბამას შემდეგ ტორნადოებმა ფლორიდისა და ჯორჯიის შტატებში გადაინაცვლა. მათ მიერ გამოწვეული ზარალის ზუსტი ოდენობა ჯერ-ჯერობით უცნობია.
შტორმის გამო ელექტროენერგია არ მიეწოდება 10,000-მდე მომხმარებელს.