გიორგი გახარიას თქმით, მამუკა ხაზარაძის განცხადებები, რომ შს მინისტრი მას ემუქრებოდა, "ერთი პრივილიგირებული ბიზნესმენის პარლამენტის ტრიბუნიდან ჭორაობით იმუნიტეტის მოპოვების მცდელობაა, სხვა ყველაფერი კი - ტყუილი".
"სხვა ყველაფერი არის ტყუილი. სხვა სიტყვებით ვთქვა? კიდევ ერთხელ ვიმეორებთ, რომ ეს არის იმუნიტეტის მოპოვების მცდელობა.
რაც შეეხება პარლამენტში მისვლას, არაერთხელ მივსულვარ, ამ საქმესთან დაკავშირებით მივალ დიდი სიამოვნებით", -- თქვა გიორგი გახარიამ. ჟურნალისტების სხვა კითხვებს მან არ უპასუხა.
თიბისი ბანკის დამფუძნებელი პარლამენტის საფინანსო-საბიუჯეტო კომიტეტის სხდომაზე წარსდგა. მან დეტალურად ისაუბრა 2007-2008 წლების ტრანზაქციებზე, რომელსაც პროკურატურა 10-11 წლის შემდეგ იძიებს. ასევე, თქვა, რომ გიორგი გახარიამ მას და მის პარტნიორს, ბადრი ჯაფარიძეს მუქარის შემცველი წერილი მისწერა და განხორციელდა კიბერ-შეტევა. პროკურატურაში ტაბულას უთხრეს, რომ მუქარაზე განცხადებების გამო, მამუკა ხაზარაძეს გამოკითხავენ.
ამასთან, ევროპული საქართველო TBC ბანკის საქმის შესასწავლად სპეციალური კომისიის შექმნას მოითხოვს.
