ტრანსგენდერთა ხილვადობის დღე

"ჩვენი ყოველი დღე ბრძოლაა!"- ტრანსგენდერთა ხილვადობის დღეზე მანიფესტს წაიკითხავენ

0 კომენტარი
ფოტო: თანასწორობის მოძრაობა

31 მარტი ტრანსგენდერ ადამიანთა ხილვადობის საერთაშორისო დღეა. ამ დღეს ტრანსგენდერი ქალების და კაცების საინიციატივო ჯგუფი ტრანსგენდერი თემის მანიფესტის წაკითხვას გეგმავს.

მანიფესტში აღწერილია საქართველოში მცხოვრები ტრანსგენდერი ადამიანების ყოფა. წერია, რომ ტრანსგენდერ ადამიანებს ყოველდღიურად უწევთ ფიზიკური და ფსიქოლოგიური ძალადობის ატანა მათი გარეგნობისა და გენდერული გამოხატვის გამო, რომ ტრანსგენდერ ადამიანებზე არ ზრუნავს სახელმწიფო.

მანიფესტში ასევე წერია:

  • საქართველოში უკვე ორი ტრანსგენდერი ქალი - ზიზი და საბი მოკლეს!
  • ჯანდაცვის სისტემა არ არის მორგებული მათ საჭიროებებზე - არ აძლევს ჰორმონოთერაპიისა და სქესის შეცვლის ოპერაციის საშუალებას. ასევე ვერ იღებენ სიცოცხლისათვის საჭირო სამედიცინო სერვისებს.
  • სახელმწიფო ტრანსგენდერ ადამიანებს აიძულებს სავალდებულო სტერილიზაციას და ოპერაციას დოკუმენტებში სქესის შესახებ ჩანაწერის შესაცვლელად.
  • სახელმწიფო ტრანსგენდერი ადამიანებისთვის არ უზრუნველყოფს შეკრებისა და მანიფესტაციის უფლებას. რის გამოც ტრანსგენდერი ადამიანების აბსოლუტურ უმრავლესობას გამუდმებით შიშში იატაკქვეშ უწევს ცხოვრება.
  • ტრანსგენდერი ადამიანებისთვის სახელმწიფო ვერ უზრუნველყოფს საგანმანათლებლო დაწესებულებებში უსაფრთხო და თანასწორ გარემოს. რის გამოც ისინი ვერ იღებენ სრულფასოვან განათლებას.
  • ტრანსგენდერ ადამიანებს სახელმწიფო არ აძლევს დასაქმების საშუალებას, არ იცავს მათ დისკრიმინაციისგან სამსახურში. რის გამოც ტრანსგენდერი ადამიანების უმრავლესობა იძულებულია ჩაერთოს სექს-სამუშაოში.
  • ტრანსგენდერი ადამიანებს აქვთ საცხოვრებლის პრობლემა. მათი ყოფა არაადამიანური, დამამცირებელი და გაუსაძლისია!

მანიფესტის ავტორები, მხარდამჭერებს მოუწოდებენ 31 მარტს facebook ლაივი ჩართონ, წაიკითხონ მანიფესტი და ასე გამოხატონ თავიანთი მხარდაჭერა ტრანსგენდერი თემის მიმართ.

"ეს არ არის მხოლოდ ტრანსგენდერი ადამიანების პრობლემა! თუ შენ ხარ დაუსაქმებელი, ან დასაქმებული დაბალანაზღაურებად სამსახურში, თუ შენი უფლებები ირღვევა შენს სამუშაო ადგილას, თუ შენ არ მიგიწვდება ხელი ჯანდაცვასა და საჭირო მედიკამენტებზე, თუ შენ ვერ იღებ განათლებას, თუ შენ იჩაგრები შენი გენდერის ან განსხვავებულობის გამო, შენ არ უნდა გაჩუმდე! არ შეეგუო უსამართლობას - ჩვენ თქვენს გვერდით ვართ! ჩვენ მხარს ვუჭერთ იმ ადამიანებს, რომელიც უკიდურეს გაჭირვებაში, უმუშევრობაში და უსახლკარობაში ცხოვრობენ. ჩვენ ვიმსახურებთ პატივისცემას და ღირსეულ ცხოვრებას. ჩვენი ყოველი დღე ბრძოლაა! შემოგვიერთდი შენც ამ ბრძოლაში!"- წერია მანიფესტში. 

ახალი ვიდეო მეტი ვიდეო

ირაკლი ტაბლიაშვილი

კომენტარები