პარლამენტის თავმჯდომარის ირაკლი კობახიძის თქმით, მთაწმინდის ოლქში ქართული ოცნების კანდიდატს ლადო კახაძესა და ევროპული საქართველოსა და თავისუფალი დემოკრატების კანდიდატს შალვა შავგულიძეს შორის მეორე ტური გაიმართება. მისი თქმით, მათ კანდიდატს 40.92% აქვს.
"მთაწმინდას რაც შეეხება, აქაც არის დათვლილი ყველა უბნის მონაცემი, ამ შემთხვევაშიც გაიმარჯვა ჩვენმა კანდიდატმა, ბატონმა ლადო კახაძემ. მაჩვენებელი არის 40.92 %. ამ შემთხვევაში შედგება მეორე ტური მთაწმინდის ოლქში, კონკურენტი იქნება შალვა შავგულიძე, რომელიც წარმოადგენს ნაციონალურ მოძრაობას" - თქვა კობახიძემ შავგულიძეზე, რომელიც ევროპულ საქართველოს და თავისუფალ დემოკრატებს წარმოადგენს.
პარლამენტის თავმჯდომარის ინფორმაციითვე, სხვა ყველა ოლქში მათი კანდიდატი პირველივე ტურში იმარჯვებს.
მთაწმინდის ოლქში პარლამენტის მაჟორიტარული არჩევნები გაიმართა. აქტივობა 34.27% იყო.
მთაწმინდის მაჟორიტარულ ოლქში შუალედური არჩევნების ჩატარება მას შემდეგ გახდა საჭირო, რაც პარლამენტში დამოუკიდებელი დეპუტატის სტატუსით შესული სალომე ზურაბიშვილი პრეზიდენტი გახდა.