ეროვნული ბანკის მონაცემებით, 31 მაისის ვაჭრობის შედეგად ლარი დოლართან მიმართებით 1.53 თეთრით, ხოლო ევროსთან მიმართებით 1.31 თეთრით გამყარდა. 1 დოლარის ოფიციალური კურსი 2.7870 ლარია, 1 ევროსი - 3.1078 ლარი.
ბოლო სამი თვის მანძილზე, ლარს დოლართან თითქმის ყოველდღიური გაუფასურების ტენდენცია აქვს. 1 მარტს 1 აშშ დოლარის ღირებულება 2.6794 ლარი იყო, რაც იმას ნიშნავს, რომ ამ პერიოდში ლარი დოლართან 11 თეთრით გაუფასურდა. ევროსთან მიმართებით კი, 1 მარტის შემდეგ, ლარი 5 თეთრით გაუფასურდა.
ფინანსთა მინისტრი ივანე მაჭავარიანი დარწმუნებულია, რომ "რყევების ერთ-ერთი განმაპირობებელი თურქეთის ფაქტორიც არის". მისივე თქმით, "მიუხედავად იმისა, რომ კურსი მიუახლოვდა 2.80-ს, ჩვენ ვერ ვხედავთ ინფლაციურ ზეწოლას". ეროვნული ბანკის პრეზიდენტის კობა გვენეტაძის თქმით კი, "შეიძლება ვთქვათ, რომ სხვა თანაბარ პირობებში, ასეთ გაუფასურებას გამყარება მოჰყვება".