ხორავას ქუჩაზე მომხდარი დაპირისპირების დროს მოკლული არასრულწლოვნის, დავით სარალიძის, მამა ამბობს, რომ მიხეილ კალანდიას დაკავებით მისი ბრძოლა არ დასრულებულა.
ზაზა სარალიძემ ამის შესახებ ტელეკომპანია "პირველის" ეთერში, გადაცემა "რეაქციაში" ისაუბრა. სარალიძემ თქვა, რომ მისი ბრძოლა იქამდე გაგრძელდება, სანამ ყველა იმ მაღალჩინოსნის ბრალეულობა არ დადგინდება, რომლებიც ამ დრომდე კალანდიას ხელს აფარებდნენ და არასრუწლოვნის მკვლელობის საქმის გამოძიებას აფერხებდნენ.
"ამით ჩემი ბრძოლა არ დასრულებულა. ბრძოლა გაგრძელდება ბოლომდე. არავინ იფიქროს, რომ გვერდზე გავიწევი იმიტომ, რომ მანამდე ვიბრძოლებ, სანამ ყველა დამნაშავე პირი არ იქნება გამოვლენილი. რაც შეეხება ამ პროკურორებს და გამომძიებლებს, მათი დანაშაულებრივი წვლილი ძალიან კარგად გამოჩნდა ტელეეკრანებზე, როდესაც საგამოძიებო კომისია იმართებოდა. მე არა მგონია, რომ ან პროკურატურას ან შინაგან საქმეთა სამინისტროს ან საერთოდ ხელისუფლებას ან საერთოდ მთელ საქართველოს აწყობდეს ასეთი პროკურორების, იმ ადამიანების საგამოძიებო უწყებებში მუშაობას, რომლებიც პირდაპირ მკვლელობაში ეჭვმიტანილ ადამიანს უწევდნენ ადვოკატირებას და დღეს უკვე ბრალდებულად წარმოგვიჩინეს," - ამბობს ზაზა სარალიძე.
სარალიძის თქმით, მას წელიწადნახევრის შემდეგ პირველად აქვს განცდა, რომ სამართლიანობა იპოვა.
"სანამ სასამართლომ ორჯერ არ უთხრა კონკრეტულად, რომ მკვლელი გარეთ არის, მანამდე ხელი არ გაანძრიეს. წელიწადნახევრის განმავლობაში პირველად მაქვს განცდა, რომ როგორც იქნა, მე ამ ჭეშმარიტებას მივაღწიე თქვენთან, ჟურნალისტებთან, საზოგადოებასთან და პოლიტიკოსებთან და ყველა იმ ადამიანთან ერთად, ვინც ირწმუნა, რომ ზაზა სარალიძე არასდროს იტყუებოდა,"- ამბობს ზაზა სარალიძე.
ხორავას ქუჩაზე მომხდარი მკვლელობის საქმეზე მიხეილ კალანდია 4 ივნისს დააკავეს. კალანდია ამ დრომდე ხორავას ქუჩაზე მომხდარის მკვლელობის საქმის მთავარი მოწმე იყო.
3 ივნისს თბილისის სააპელაციო სასამართლომ ხორავას ქუჩის საქმეზე გამოიტანა გადაწყვეტილება, რომლის მიხედვითაც, არასრულწლოვანი გ.ჯ დამნაშავედ ცნო დავით სარალიძის ჯგუფურად მკვლელობაში, დაუდგენელ პირთან ერთად.
3 ივნისის გადაწყვეტილებით გ.ჯ-ს ბრალი გადაუკვალიფიცირდა. 2018 წლის 31 მაისს თბილისის საქალაქო სასამართლოს მოსამართლე ეკა აროშიძემ ის მხოლოდ ლევან დადუნაშვილის მკვლელობაში ცნო დამნაშვედ, დავით სარალიძის საქმეზე კი გამოაცხადა, რომ გ.ჯ დამნაშავე იყო არა მკვლელობის, არამედ მკვლელობის მცდელობისთვის.
გ.ჯ-ს სააპელაციო სასამართლომ არასრულწლოვანთა მართლმსაჯულების კოდექსის თანახმად, საბოლოო სასჯელის სახით განესაზღვრა თავისუფლების აღკვეთა 11 წლის და 3 თვის ვადით.
რაც შეეხება მეორე ბრალდებულს, გ.ბ-ს - სააპელაციო სასამართლო დაეთანხმა ეკა აროშიძის 1 წლის წინანდელ გადაწყვეტილებას და თქვა, რომ ის მხოლოდ ლევან დადუნაშვილის მკვლელობაშია ბრალდებული, დავით სარალიძის მკვლელობის ნაწილში კი უდანაშაულოა.
მიუხედავად ამისა, სააპელაციო სასამართლომ მას მაინც დაუმძიმა სასჯელი და არასრულწლოვანთა მართლმსაჯულების კოდექსის თანახმად, საბოლოოდ განუსაზღვრა თავისუფლების აღკვეთა 11 წლის და 3 თვის ვადით.
თბილისის საქალაქო სასამართლოს გადაწყვეტილება მეორე ინსტანციაში ბრალდების მხარეს ჰქონდა გასაჩივრებული.
პროკურატურა ამბობდა, რომ ეკა აროშიძემ უკანონო გადაწყვეტილება მიიღო, როდესაც თქვა, რომ გ.ბ არ არის დამნაშავე დავით სარალიძის მკვლელობის ნაწილში. ბრალდების მხარე სააპელაციო სასამართლოსგან სწორედ გ.ბ-ს დამნაშავედ ცნობას ითხოვდა.
კალანდიას დაკავებას ევროპული საქართველოს მიერ შექმნილი საპარლამენტო დროებითი საგამოძიებო კომისია ჯერ კიდევ 5 სექტემბერს მოითხოვდა.
თუმცა, საგამოძიებო კომისიის მიერ გამოქვეყნებული დასკვნაში მიხეილ კალანდიას დაკავება ერთადერთი რეკომენდაცია არ ყოფილა. ევროპული საქართველოს წევრები მთელი რიგი მაღალჩინოსნების პასუხისმგებლობის დაყენებას მოითხოვდნენ, როგორც პოლიტიკურ, ისე სისხლისსამართლებრივ ნაწილში.
კერძოდ, საგამოძიებო კომისია პროკურატურის ყოფილი მაღალჩინოსნის, მირზა სუბელიანის, ქმედებებზე გამოძიების დაწყებას ითხოვდა. კერძოდ, საქართველოს პარლამენტის დროებითი საგამოძიებო კომისიისთვის ცრუ ახსნა-განმარტების მიცემის, სამსახურებრივი უფლებამოსილების ბოროტად გამოყენების, გამოსაკითხ პირზე, მოწმეზე, დაზარალებულზე, ექსპერტზე ან თარჯიმანზე ზემოქმედების განხორციელებისა და გამოძიებისთვის ხელის შეშლის ბრალდებებით.
კომისია ასევე საგამოძიებო პროცესში ჩადენილი დარღვევების გამო პროკურატურისა და შინაგან საქმეთა სამინისტროს თანამდებობის პირების პასუხისმგებლობის დაყენებას და სისხლის სამართლის საქმის გამოძიებაზე პასუხისმგებელი მოხელეების/თანამდებობის პირების მიერ ჩადენილ დარღვევებზე რეაგირებას ითხოვდა.
კომისია ასევე ყოფილი მთავარი პროკურორის, ირაკლი შოთაძის, ქმედებებზე გამოძიების დაწყებასაც ითხოვდა, სამსახურეობრივი გულგრილობისა და ძალაუფლების ბოროტად გამოყენების ბრალდებებით.
და ბოლოს, კომისია მოითხოვდა, დამდგარიყო შინაგან საქმეთა მინისტრის, გიორგი გახარიასა, და იუსტიციის მინისტრის, თეა წულუკიანის, პოლიტიკური პასუხისმგებლობის საკითხი, რომ მათ დაკავებული თანამდებობები დაეტოვებინათ.
