ნიკა მელიას საქმე

ნიკა მელიას საზოგადოებრივი თავშეყრის ადგილას საჯარო განცხადებების გაკეთება აეკრძალა

0 კომენტარი
ნიკა მელია სასამართლოს სხდომის დარბაზში ფოტო: ტაბულა

ნიკა მელიას სასამართლომ საზოგადოებრივი თავშეყრის ადგილას საჯარო განცხადებების გაკეთება აუკრძალა. როგორც თბილისის საქალაქო სასამართლოში გამართულ ბრიფინგზე გახდა ცნობილი, ენმ-ის დეპუტატს 30 000-ლარიანი გირაოს გარდა, დამატებითი ვალდებულებების შესრულება დაეკისრა.

"საქმის მასალების შეფასებისა და მხარეთა პოზიციების მოსმენის შემდეგ, სასამართლომ მიიჩნია, რომ დასაბუთებული ვარაუდით არსებობს არსებობს ბრალდებულ ნიკანორ მელიასთვის აღკვეთის ღონისძიების გამოყენების აუცილებელი ფაქტობრივი და ფორმალური საფუძვლები. თუმცა სასამართლომ გაითვალისწინა, რომ რეალურად, მოცემულ შემთხვევაში ბრალდებულის მიმართ აღკვეთის ღონისძიების სახით გამოყენებული იქნა გირაო, გაზრდილი ოდენობით, ამავდროულად, სასამართლომ გამოიყენა დამატებითი ვალდებულებები და მიიჩნია, რომ ამ ვალდებულებების დაკისრებით შესრულებული იქნება გირაოს პირობები და შესაბამისად, გირაოს და დამატებითი ვალდებულებების ერთობლივად გამოყენების პირობებში, სრულად იქნება მიღწეული აღკვეთის ღონისძიების ყველა მიზანი" - აცხადებენ სასამართლოში.

ნიკა მელიას ეკრძალება:

  • საცხოვრებელი ადგილის დატოვება საგამოძიებო ორგანოს ინფორმირების და თანხმობის გარეშე;
  • საზოადოებრივი თავშეყრის ადგილას საჯარო განცხადებების გაკეთება;
  • მოწმეებთან ნებისმიერი სახის კომუნიკაცია;
  • დაეკისრა, საგამოძიებო ორგანოებისთვის პასპორტის და პირადობის დამადასტურებელი სხვა დოკუმენტების ჩაბარებისვალდებულება. 

"ამ ყველა ღონისძიების და მათ შორის, გაზრდილი გირაოს შეფარდებით, სასამართლომ მიიჩნია, რომ უზრუნველყოფილი იქნება აღკვეთის ღონისძიების ყველა მიზანი" - აცხადებენ სასამართლოში.

წინასასამართლო სხდომა გაიმართება 14 აგვისტოს, 12 საათზე.

26 ივნისს ქართული ოცნების 91-მა დეპუტატმა პროკურატურას უფლება მისცა, ნიკა მელიას დაპატიმრება მოეთხოვა. საგამოძიებო უწყება აღკვეთის ღონისძიებად პატიმრობის გამოყენებას მოწმეებზე ზეწოლის, დანაშაულის განმეორების და მტკიცებულებების განადგურების საფრთხის მოტივით ითხოვდა. 

ნიკა მელიას მმართველი გუნდი და მათგან გამომდინარე, პროკურატურა 20 ივნისის აქციაზე ჯგუფური ძალადობის ორგანიზებას, ხელმძღვანელობასა და მასში მონაწილეობას ედავება. 

შეგახსენებთ, რომ 20 ივნისის აქცია სპეცრაზმმა ძალადობრივად დაშალა. დაშავდა 160 ადამიანი, მათ შორის, ორმა თვალი დაკარგა, კიდევ ორი - ამ დრომდე მართვით სუნთქვაზე რჩება. მათ გარდა, სამედიცინო დაწესებულებებში გადაიყვანეს 60 პოლიციელი. ერთი კვირაა, პარლამენტთან მრავალათასიანი აქცია მიმდინარეობს, სადაც დემონსტრანტები შს მინისტრის, გიორგი გახარიას თანამდებობიდან წასვლას ითხოვენ. მმართველი გუნდი გიორგი გახარიას პასუხისმგებლობას ვერ ხედავს - ქართული ოცნება, ერთი მხრივ "პროვოკატორი ოპოზიციონერების", მეორე მხრივ კი, იმ სპეცრაზმელების დასჯას აპირებს, ვინც ძალას გადაამეტა. შსს-მ უფლებამოსილება შეუჩერა ათ სამართალდამცველს, მათგან ორის ქმედებებში კი, სისხლის სამართლებრივი დანაშაულის ნიშნები დაინახა.

ახალი ვიდეო მეტი ვიდეო

ხათო ფსუტური

კომენტარები