ნიკა მელია

ნიკა მელიასთვის აღკვეთის ღონისძების სახით გირაოს შეფარდებას პროკურატურა გაასაჩივრებს

ნიკა მელია სასამართლოს სხდომის დარბაზში
ტაბულა

ნიკა მელიასთვის აღკვეთის ღონისძების სახით გირაოს შეფარდებას პროკურატურა სააპელაციო სასამართლოში გაასაჩივრებს. ამის შესახებ ინფორმაცია ტაბულას მთავარ პროკურატურაში დაუდასტურეს.

მელიას საქალაქო სასამართლოს მოსამართლემ თემურ გოგოხიამ გუშინ აღკვეთით ღონისძების სახით 30 000 ლარიანი გირაო შეუფარდა, ბრალდების მხარე პატიმრობას ითხოვდა. 

მელიასთვის პატიმრობის შეფარდებას პროკურატურა მოწმეებზე ზეწოლის, დანაშაულის განმეორების და მტკიცებულებების განადგურების საფრთხის მოტივით ითხოვდა. დაცვის მხარის შუამდგომლობა კი გირაოს სახით 10 ათასი ლარის შეფარდება იყო. 

26 ივნისს ქართული ოცნების 91-მა დეპუტატმა საგამოძიებო უწყებას მელიას დაკავების შესაძლებლობა მისცა, მას სადეპუტატო იმუნიტეტი შეუჩერეს. 

მელიას მმართველი გუნდი და მათგან გამომდინარე, პროკურატურა 20 ივნისის აქციაზე ჯგუფური ძალადობის ორგანიზებას, ხელმძღვანელობასა და მასში მონაწილეობას ედავება. 

შეგახსენებთ, რომ 20 ივნისის აქცია სპეცრაზმმა ძალადობრივად დაშალა. დაშავდა 160 ადამიანი, მათ შორის, ორმა თვალი დაკარგა, კიდევ ორი - ამ დრომდე მართვით სუნთქვაზე რჩება. მათ გარდა, სამედიცინო დაწესებულებებში გადაიყვანეს 60 პოლიციელი. ერთი კვირაა, პარლამენტთან მრავალათასიანი აქცია მიმდინარეობს, სადაც დემონსტრანტები შს მინისტრის, გიორგი გახარიას თანამდებობიდან წასვლას ითხოვენ. მმართველი გუნდი გიორგი გახარიას პასუხისმგებლობას ვერ ხედავს - ქართული ოცნება, ერთი მხრივ "პროვოკატორი ოპოზიციონერების", მეორე მხრივ კი, იმ სპეცრაზმელების დასჯას აპირებს, ვინც ძალას გადაამეტა. შსს-მ უფლებამოსილება შეუჩერა ათ სამართალდამცველს, მათგან ორის ქმედებებში კი, სისხლის სამართლებრივი დანაშაულის ნიშნები დაინახა.

კომენტარები