EBD-ის 2020 წლის კონკურსში თბილისის მონაწილეობისთვის მერია ფოტოკონკურსს აცხადებს. დედაქალაქის მთავრობის ცნობით, თბილისი European Best Destinations-ის 2020 წლის კონკურსის "წლის საუკეთესო ევროპული მიმართულება" კანდიდატია.
როგორც კახა კალაძემ თბილისის მუნიციპალიტეტის მთავრობის სხდომაზე თქვა, მერია ფოტოკონკურსს გამოაცხადებს იმისთვის, რომ EBD-ზე წარსადგენი საუკეთესო ფოტოები გამოვლინდეს.
"თბილისი კონკურსის "წლის საუკეთესო ევროპული მიმართულება" კანდიდატია. კონკურსს ორგანიზაცია European Best Destinations (EBD) ატარებს. მასში სხვადასხვა ქვეყანა იღებს მონაწილეობას და თბილისიც მოხვდა. ჩვენ ვგეგმავთ ფოტოკონკურსის გამოცხადებას და ძალიან გამიხარდება, თუ მასში ბევრი ფოტოგრაფი ჩაერთვება“, - აღნიშნა კახა კალაძემ.
თბილისის მერის მოადგილის სოფიო ხუნწარიას განმარტებით, "30 ქართველი ფოტოგრაფის მიერ გადაღებული ფოტო არის საჭირო იმისთვის, რომ EBD-ის კონკურსში მონაწილეობა მივიღოთ". მისი თქმით, მერია გამოაცხადებს კონკურსს და სთხოვს ყველა ფოტოგრაფს, რომ ჩაერთოს ამ პროცესში.
"იმიტომ, რომ ნამდვილად მნიშვნელოვანი დაჯილდოებაა. ჩვენ გვაქვს შანსი, რომ 2020 წელს EBD-ს საუკეთესო ქალაქი გავხდეთ. ფოტოგრაფებმა ფოტოები მერიის ვებგვერდზე, სპეციალურ გვერდზე უნდა ატვირთონ. შემდეგ საუკეთესოს სპეციალური ჟიური გამოავლენს“, - განაცხადა სოფიო ხუნწარიამ.
EBD-ის კონკურსის გამარჯვებული ხმის მიცემით გამოვლინდება.
"დარწმუნებული ვარ, რომ თბილისი თავის სიტყვას აუცილებლად იტყვის. მართლაც ულამაზესია ჩვენი ქალაქი თავისი კულტურით, ტრადიციებით, შენობა-ნაგებობებით, კონკრეტული ადგილებით, რომელიც ადამიანებმა აუცილებლად უნდა ნახონ. ვინც კი ერთხელ მაინც ყოფილა თბილისში, გამორიცხულია, რომ მეორედ და მესამედ არ ჩამოვიდეს. ჩემი იტალიელი მეგობრები ერთხელ რომ ესტუმრნენ თბილისს, მას მერე მასზე და ქართველ ხალხზე შეყვარებულები არიან“, - ამბობს კახა კალაძე.
European Best Destinations-ის ვებგვერდზე თბილისისათვის შეიქმნება სპეციალური საკონკურსო ლინკი, სადაც დედაქალაქის და მისი ტურისტული პროდუქტების შესახებ ინფორმაცია და ფოტომასალა განთავსდება. ამ ბმულით მსურველებს მთელი მსოფლიოდან ექნებათ საშუალება, ხმა მისცენ თბილისს, როგორც ევროპის საუკეთესო მიმართულებას მოგზაურობისათვის.
