თბილისის საქალაქო სასამართლოში მიხეილ კალანდიას წინასასამართლოს სხდომა მიმდინარეობს. სხდომა დახურულია, ამის შესახებ შუალმდგომლობა ბრალდების მხარემ დააყენა. დღევანდელ სხდომაზე მტკიცებულებების დასაშვებობაზე იმსჯელებენ, პროკურორი ამბობს, რომ საქმეში ახალი მტკიცებულებებია, მათ შორის 2019 წლის.
„დღევანდელ პროცესზე მსჯელობა იქნება მტკიცებულებების დასაშვებობის საკითხზე. ბრალდების მხარეს წარმოდგენილი აქვს მტკიცებულებები და ვუშუამდგომლებთ მათ დასაშვებად ცნობას. ასევე გადაისინჯება აღკვეთის ღონისძიება საპროცესო კოდექსის მოთხოვნიდან გამომდინარე. ბრალდების მხარე თავდაპირველ პოზიციას უჭერს მხარს და მივიჩნევთ, რომ არსებობს საქმეში საკმარისი მტკიცებულებები აღკვეთის გამოყენებისათვის. კონკრეტულად მტკიცებულებების შინაარსში მე ვერ შევალ, თუმცა შემიძლია მოგახსენოთ, რომ საქმეში არსებობს როგორც წერილობითი მტკიცებულებები, ასევე აუდიო-ვიდეო ჩანაწერები, ექსპერტიზის დასკვნები და სხვა სახის მტკიცებულებები. არის მათ შორის ახალი მტკიცებულებები 2019-ის,“-თქვა პროკურორმა მირიან მეგრელიშვილმა.
დაცვის მხარე კი აღკვეთის ღონისძიებით სახით პატიმრობის გირაოთი შეცვლას ითხოვს და ამბობს, რომ საქმეში ახალი მტკიცებულებები არ არის.
„დღეის მოცემულობით, რაც საბოლოოდ გავცვალეთ ბრალდების და დაცვის მხარემ მტკიცებულებები ახალი ამ ეტაპზეც არაფერი არ არის. უბრალოდ ახლიდან არის გამოკითხული რამდენიმე მოწმე, რომელიც ახალს ამ საქმესთან დაკავშირებით არაფერს არ ამბობს. რაც შეეხება აღკვეთის ღონისძიების შეცვლასთან დაკავშირებით, რა თქმა უნდა დაცვის მხარეს აქვს მოტივირებული პოზიცია, თუ რატომ უნდა შეიცვალოს გამოყენებული პატიმრობა და დაველოდოთ სასამართლოს გადაწყვეტილებას,“- ამბობს ადვოკატი.
ხორავას ქუჩაზე მომხდარი მკვლელობის საქმეზე მიხეილ კალანდია 4 ივნისს დააკავეს. კალანდია ამ დრომდე ხორავას ქუჩაზე მომხდარის მკვლელობის საქმის მთავარი მოწმე იყო.
3 ივნისს თბილისის სააპელაციო სასამართლომ ხორავას ქუჩის საქმეზე გამოიტანა გადაწყვეტილება, რომლის მიხედვითაც, არასრულწლოვანი გ.ჯ დამნაშავედ ცნო დავით სარალიძის ჯგუფურად მკვლელობაში, დაუდგენელ პირთან ერთად.
3 ივნისის გადაწყვეტილებით გ.ჯ-ს ბრალი გადაუკვალიფიცირდა. 2018 წლის 31 მაისს თბილისის საქალაქო სასამართლოს მოსამართლე ეკა აროშიძემ ის მხოლოდ ლევან დადუნაშვილის მკვლელობაში ცნო დამნაშვედ, დავით სარალიძის საქმეზე კი გამოაცხადა, რომ გ.ჯ დამნაშავე იყო არა მკვლელობის, არამედ მკვლელობის მცდელობისთვის.
გ.ჯ-ს სააპელაციო სასამართლომ არასრულწლოვანთა მართლმსაჯულების კოდექსის თანახმად, საბოლოო სასჯელის სახით განესაზღვრა თავისუფლების აღკვეთა 11 წლის და 3 თვის ვადით.
რაც შეეხება მეორე ბრალდებულს, გ.ბ-ს - სააპელაციო სასამართლო დაეთანხმა ეკა აროშიძის 1 წლის წინანდელ გადაწყვეტილებას და თქვა, რომ ის მხოლოდ ლევან დადუნაშვილის მკვლელობაშია ბრალდებული, დავით სარალიძის მკვლელობის ნაწილში კი უდანაშაულოა.
მიუხედავად ამისა, სააპელაციო სასამართლომ მას მაინც დაუმძიმა სასჯელი და არასრულწლოვანთა მართლმსაჯულების კოდექსის თანახმად, საბოლოოდ განუსაზღვრა თავისუფლების აღკვეთა 11 წლის და 3 თვის ვადით.
თბილისის საქალაქო სასამართლოს გადაწყვეტილება მეორე ინსტანციაში ბრალდების მხარეს ჰქონდა გასაჩივრებული.
პროკურატურა ამბობდა, რომ ეკა აროშიძემ უკანონო გადაწყვეტილება მიიღო, როდესაც თქვა, რომ გ.ბ არ არის დამნაშავე დავით სარალიძის მკვლელობის ნაწილში. ბრალდების მხარე სააპელაციო სასამართლოსგან სწორედ გ.ბ-ს დამნაშავედ ცნობას ითხოვდა.
კალანდიას დაკავებას ევროპული საქართველოს მიერ შექმნილი საპარლამენტო დროებითი საგამოძიებო კომისია ჯერ კიდევ 5 სექტემბერს მოითხოვდა.
თუმცა, საგამოძიებო კომისიის მიერ გამოქვეყნებული დასკვნაში მიხეილ კალანდიას დაკავება ერთადერთი რეკომენდაცია არ ყოფილა. ევროპული საქართველოს წევრები მთელი რიგი მაღალჩინოსნების პასუხისმგებლობის დაყენებას მოითხოვდნენ, როგორც პოლიტიკურ, ისე სისხლისსამართლებრივ ნაწილში.
კერძოდ, საგამოძიებო კომისია პროკურატურის ყოფილი მაღალჩინოსნის, მირზა სუბელიანის, ქმედებებზე გამოძიების დაწყებას ითხოვდა. კერძოდ, საქართველოს პარლამენტის დროებითი საგამოძიებო კომისიისთვის ცრუ ახსნა-განმარტების მიცემის, სამსახურებრივი უფლებამოსილების ბოროტად გამოყენების, გამოსაკითხ პირზე, მოწმეზე, დაზარალებულზე, ექსპერტზე ან თარჯიმანზე ზემოქმედების განხორციელებისა და გამოძიებისთვის ხელის შეშლის ბრალდებებით.
კომისია ასევე საგამოძიებო პროცესში ჩადენილი დარღვევების გამო პროკურატურისა და შინაგან საქმეთა სამინისტროს თანამდებობის პირების პასუხისმგებლობის დაყენებას და სისხლის სამართლის საქმის გამოძიებაზე პასუხისმგებელი მოხელეების/თანამდებობის პირების მიერ ჩადენილ დარღვევებზე რეაგირებას ითხოვდა.
კომისია ასევე ყოფილი მთავარი პროკურორის, ირაკლი შოთაძის, ქმედებებზე გამოძიების დაწყებასაც ითხოვდა, სამსახურეობრივი გულგრილობისა და ძალაუფლების ბოროტად გამოყენების ბრალდებებით.
და ბოლოს, კომისია მოითხოვდა, დამდგარიყო შინაგან საქმეთა მინისტრის, გიორგი გახარიასა, და იუსტიციის მინისტრის, თეა წულუკიანის, პოლიტიკური პასუხისმგებლობის საკითხი, რომ მათ დაკავებული თანამდებობები დაეტოვებინათ.
