15 ივლისს თურქეთის პრეზიდენტმა რეჯეფ თაიფ ერდოღანმა განაცხადა, რომ 2020 წლის აპრილამდე რუსულ სარაკეტო სისტემას თავიანთ ადგილას განალაგებდნენ. აღნიშნული განცხადება მან 2016 წლის "სამხედრო გადატრიალების მცდელობის" მე-3 წლისთავზე გააკეთა.
"S-400 ყველაზე მძლავრი თავდაცვითი სისტემაა მათ წინააღმდეგ, ვისაც ჩვენ ქვეყანაზე თავდასხმა სურს. ღვთის ნებით, ჩვენ ამას რუსეთთან ერთობლივი ინვესტიციით ვაკეთებთ და ასეც გავაგრძელებთ," - განაცხადა ერდოღანმა.
ერდოღანმა ისიც თქვა, რომ 8 თვითმფრინავისთვის რუსული სისტემის ნაწილები უკვე იყიდეს და უფრო მეტის მიღებას ელოდებოდნენ.
12 ივლისს თურქეთმა რუსული S-400 ტიპის სარაკეტო თავდაცვის სისტემის პირველი ნაწილი მიიღო. ქვეყნის თავდაცვის სამინისტროს ინფორმაციით, სისტემას სირიის საზღვართან განათავსებენ.
აშშ-მა უკვე დაიწყო თურქეთის F-35 ტიპის საბრძოლო თვითმფრინავების პროგრამიდან გარიცხვის პროცესი და შეაჩერა თურქი პილოტების წვრთნა.
შეგახსენებთ, რომ თურქეთის პრეზიდენტმა, რეჯეფ თაიფ ერდოღანმა მაისში თქვა, რომ რუსეთისაგან S-400 ტიპის სარაკეტო თავდაცვის სისტემის შეძენის შემდეგ ანკარა მოსკოვთან ერთად S-500 ტიპის თავდაცვის სისტემის წარმოებაზეც იმუშავებს.
აშშ-მა თურქეთის მიერ რუსული სარაკეტო სისტემის შეძენას პრობლემატური უწოდა და თქვა, რომ ეს რისკის ქვეშ დააყენებს მათთვის F-35 ტიპის საბრძოლო თვითმფრინავების მიყიდვას, თუმცა ამის თაობაზე ერდოღანმა თქვა, რომ აშშ ამ საკითხზე ყოყმანობს და თურქეთი საბრძოლო თვითმფრინავებს ადრე თუ გვიან მაინც მიიღებს.
აშშ-ის თავდაცვის უწყების წარმომადგენლები კი ამბობენ, რომ არ სურთ ამერიკული საბრძოლო თვითმფრინავების რუსულ სარაკეტო სისტემასთან განთავსება, რადგან ამგვარად, შესაძლოა, რუსეთმა მისი სისუსტეების შესხებ ინფორმაცია მოიპოვოს.
შეთანხმების მიხედვით თურქეთი რუსეთისაგან დაახლოებით 2 მილიარდი აშშ დოლარის ღირებულების S-400 ტიპის სარაკეტო სისტემებს შეიძენს.
თურქეთი და რუსეთი იარაღის შეძენის შესახებ მოლაპარაკებებს წელიწადზე მეტია აწარმოებენ.
შეთანხმებამ NATO-ს მოკავშირეებში შეშფოთება გამოიწვია ნაწილობრივ იმიტომ, რომ ამ იარაღის NATO-ს თავდაცვის სიტემაში ინტეგრაცია ვერ მოხდება.
თურქეთის თავდაცვის მინისტრმა ჰულუსი აკარმა განაცხადა, რომ რუსული S-400-ის ყიდვით თურქეთი NATO-ს არ ემიჯნება. მისი თქმით, ამ შენაძენის გამო ანკარა არ უნდა გამოითიშოს F-35 პროექტიდან.
