იუსტიციის უმაღლეს საბჭოში უზენაეს სასამართლოში უვადოდ დასანიშნ მოსამართლეებთან გასაუბრება მიმდინარეობს.
მოკლე სიაში სულ 50 მოსამართლეა. იუსტიციის უმაღლესი საბჭო კითხვებს სწორედ მათ უსვამს. მას შემდეგ, რაც ყველა მათგანს მოუსმენს საბჭო პარლამენტს 20 კანდიდატს 20 ვაკანტურ თანამდებობაზე დასამტკიცებლად წარუდგენს.
საბჭოს წევრების კითხვებს 19 ივლისს ერთ-ერთმა კანდიდატმა, მთავარი პროკურორის პირველმა მოადგილემ, მირანდა ერემაძემ უპასუხა.
გასაუბრება 2 საათსა და 15 წუთს გაგრძელდა, სულ დაისვა 62 შეკითხვა, მათ შორის ლგბტ საკითხებზე, გამოხატვის თავისუფლებაზე, ქალთა მიმართ ძალადობაზე, ასევე, სასამართლოს სტრუქტურასა და სხვა საკითხებზე.
გამოხატვის თავისუფლება
საბჭოს წევრი სერგო მეთოფიშვილი:
"ერთ-ერთ ქვეყანაში მიიღეს კანონი სიძულვილის ენის კრიმინალიზაციის. თქვენ რას ფიქრობთ?"
მირანდა ერემაძე:
"ამ შემთხვევაში განსხვავებულია ამერიკული და ევროპული მიდგომები. მე მიმაჩნია, რომ ჩვენი კანონმდებლობა არის უფრო ამერიკული. მე არ ვემხრობი სიძულვილის ენის კრიმინალიზაციას და მიმაჩნია, რომ ამ შემთხვევაში უმჯობესი იქნება, რომ სახელმწიფომ ირიბი ზემოქმედება მოახდინოს საზოგადოებაზე, გაზარდოს ცნობიერება ამ კუთხით, რომ საზოგადოება არ იყოს ჰომოფობიური, ქსენოფობიური და შესაბამისად მედიაც არ იქნება ამ შემთხვევაში სიძულვილის ენით გაჟღენთილი".
საბჭოს წევრი ზაზა ხარებავა:
"მაინტერესებს თქვენი მოსაზრება სოციალური მედიის გამოყენებასთან დაკავშრებით. რა დოზით, რა ფორმით, ზღვარი სად უნდა გადიოდეს და მაგალითები რომ მოგვიყვანოთ, რა ჩაითვლებოდა ეთიკის ნორმების დარღვევად და სად შეიძლება მოსამართლე არ შეიზღუდოს გამოხატვაში, როგორც პიროვნება?"
მირანდა ერემაძე:
"ფეისბუქი შეიძლება ზომიერად გამოიყენოს, რაც შეეხება აქტივობას, ჩვეულებრივ შემთხვევაში, როდესაც არ ვსაუბრობთ Facebook-ზე, ჩვეულებრივ შემთხვევაში რა შეზღუდვებიც აქვს მოსამართლეს, იმავე შეზღუდვებით შეუძლია გამოხატოს თავისი მოსაზრებები სოციალური მედია იქნება თუ ფეისბუქი, ამას არსებითი მნიშვნელობა არ აქვს"
ლგბტქ საკითხები
საბჭოს წევრი ლევან გზირიშვილი:
"კონსტიტუციის ახალ რედაქციაში, სხვა ცვლილებებთან ერთად, ერთ-ერთი ცვლილება იყო ოჯახის განმარტება. როგორ მიგაჩნიათ, როგორც მოქალაქეს, როგორც იურისტს, საჭირო იყო თუ არა ამ განმარტების გაკეთება და ხომ არ მოდის წინააღმდეგობაში ანტიდისკრიმინაციულ კანონმდებლობასთან? და ზოგადად, ირღვევა თუ არა ჩვენს ქვეყანაში ლგბტ თემის ინტერესები? გქონდათ თუ არა სურვილი მონაწილეობა მიგეღოთ პრაიდში?"
მირანდა ერემაძე:
"სურვილი არ მქონია, ვინაიდან ვთვლი, რომ მოსამართლემ თავი უნდა შეიკავოს მონაწილეობისგან. რაც შეეხება კონსტიტუციის დათქმას, მიმაჩნია, რომ ჩვენი საზოგადოების ვითარებიდან, მოთხოვნიდან გამომდინარე არის ეს ჩანაწერი კონსტიტუციაში და მე ვთვლი, რომ არსებითად ეწერება თუ არ ეწერება კონსტიტუციაში, ეს რეალურ ვითარებას არ შეცვლის და არანაირი მნიშვნელობა არ აქვს. რაც შეეხება დისკრიმინაციას, არ ვიცი... არ მიფიქრია ამ საკითხზე, კონსტიტუცია იერარქიით უფრო მაღლა მდგომია, შესაბამისად ვთვლი, რომ კონსტიტუციის შესაბამისი უნდა იყოს კანონი და არა პირიქით".
საბჭოს წევრი დიმიტრი გვრიტიშვილი:
"რა განსხვავებაა სექსუალურ ორიენტაციასა და გენდერულ იდენტობას შორის?"
მირანდა ერემაძე:
"გენდერული იდენტობა გახლავთ შინაგანი დამოკიდებულება სუბიექტის სქესთან დაკავშირებით, ანუ როგორ აღიქვამს სუბიექტი მის სქესს, სექსუალური ორიენტაცია ისედაც გასაგებია, რაც არის".
ქალთა საკითხები
საბჭოს წევრი ირაკლი ბონდარენკო:
"ბოლო პერიოდში ფართოდ დაიწყო ქვეყანაში ზრუნვა ქალთა ძალადობის პრევენციის მიმარულებით და ბევრი ღონისძიებები გატარდა. თქვენი პოზიცია მაინტერესებს საკმარისია თუ არა ის მექანიზმები, რაც არის და რა გაკეთდა ბოლო პერიოდში, რომ ეს ყველაფერი აღმოფხვრას ან ნულამდე იქნას დაყვანილი? კიდევ რას ფიქრობთ, რა შეიძლება გაკეთდეს?"
მირანდა ერემაძე:
"სტამბულის კონვენცია გახლავთ უმნიშვნელოვანესი კონვენცია, რომლის საფუძველზეც შესაბამისი საკანონმდებლო ცვლილებები განხორციელდა, დაწესდა სისხლის სამართლებრივი პასუხისმგებლობა ამ კუთხით და ჩაითვალა ქალთა მიმართ ძალადობა როგორც დისკრიმინაცია. ვთვლი, რომ სამართლებრივი მექანიზმები არის ქმედითი, პოლიციის მხრიდან ამ სამართლებრივი მექანიზმების გამოყენება აქტიურად ხდება და ვთვლი, რომ ამ კუთხით უნდა გამოსწორდეს მდგომარეობა".
დისკრიმინაცია
საბჭოს წევრი ირმა გელაშვილი:
"ვთქვათ, მთაწმინდის პარკში მიგყავთ შვილები სასერნოდ და გხვდებათ აბრა, რომ პარკში შესვლა საქართველოს მოქალაქეებისთვის არის 5 ლარი, უცხო ქვეყნის მოქალაქეებისთვის – 10 ლარი. იქნება თუ არა ეს არათანაბარი მიდგომა, იქნება თუ არა ეს გამართლებული და შეიცვლება თუ არა რამე, თუ კი იქნება არა საქართველოს მოქალაქე, არამედ ქართველისთვის 5 ლარი და ყველა დანარჩენისთვის 10 ლარი?"
მირანდა ერემაძე:
"ასეთი აბრები ბევრი მინახავს, საქართველოშიც და ევროპაშიც. იმისათვის, რომ შევაფასოთ არის თუ არა მიდგომა დისკრიმინაციული, შესაბამისად გვჭირდება მიზანი რა არის, გონივრული, ობიექტური დასაბუთება. ევროპული მიდგომებიდან გამომდინარე ვთვლი, რომ მიზანი, რა მიზანს ემსახურება ამ შემთხვევაში ეს განსხვავება. რადგანაც ევროპული მიდგომა ასეთია, დისკრიმინაიული არ გახლავთ ეს მიდგომა. ეროვნებაზე ხაზგასმა თუ იქნება, იქნება დისკრიმინაცია ეროვნების ნიშნით".
იუსტიციის უმაღლესი საბჭოს გვერდზე გამოქვეყნებული განცხადების მიხედვით, უზენაეს სასამართლოში მოსამართლის 20 ვაკანტურ პოზიციაზე უვადოდ განთავსებისთვის თავდაპირველად 144 კანდიდატი იბრძოდა.
20 ივნისს იუსტიციის უმაღლეს საბჭოში პირველი ფარული კენჭისყრა გაიმართა. კენჭისყრის შედეგად შემდეგ, გასაუბრების ეტაპზე 50 კანდიდატი გადავიდა. ამ 50 კანდიდატის შერჩევის პროცედურებთან დაკავშირებით კითხვის ნიშნები აქვს სახალხო დამცველს. ომბუდსმენი ამ პროცესში ნეპოტიზმსა და გარიგებაზე საუბრობს.
50-კაციან სიაში, სხვა კანდიდატებთან ერთად არის იუსტიციის უმაღლესი საბჭოს თავმჯდომარე, გიორგი მიქაუტაძეც, რომელსაც ჯანეზაშვილი და დოლიძე, ასევე არასამთავრობო ორგანიზაციები ბრალს "კლანის წევრობაში" სდებენ.
იუსტიციის უმაღლეს საბჭოში კანდიდატებთან გასაუბრება 17 ივლისს დაიწყო.
