რუსეთი

რუსეთში რაკეტის ძრავის აფეთქების შემდეგ რადიოაქტიური იზოტოპები აღმოაჩინეს

0 კომენტარი
ფოტო: ABC

რუსეთის მეტეოროლოგიური სააგენტოს 26 აგვისტოს ინფორმაციით, 8 აგვისტოს აფეთქების შემდეგ ჩრდილოეთში მდებარე ერთერთი სამხედრო ბაზიდან აღებულ ნიმუშებში სტრონციუმ 91-ის, ბარიუმ 139-ის, ბარიუმ 140-ის და ლანთან 140-ის რადიოაქტიური იზოტოპები აღმოაჩინეს. 

ადგილობრივმა მმართველმა იგორ ორლოვმა თქვა, რომ ის პოზიტიურად იყო განწყობილი - "მე მაქვს ყველა მიზეზი, რათა დავადასტურო, რომ არხანგელსკის რეგიონის ხალხის სიცოცხლესა და ჯანმრთელობას არანაირი ფაქტორი უქმნის საფრთხეს".

"ინციდენტს რეგიონის არცერთი მცხოვრებზე ან მედიკოსზე არ უმოქმედია," - განაცხადა მან.

აღნიშნული იზოტოპების ნახევრად დაშლის პერიოდი არის - სტრონციუმ 91 - 9.3 საათი, ბარიუმ 139 - 83 წუთი, ბარიუმ 140 - 12,8 დღე, ლანთან 140 - 40 საათი.

შეგახსენებთ, რომ 8 აგვისტოს რუსეთში არხანგელსკის რეგიონში სამხედრო ბაზაზე რაკეტის ძრავა გამოცდისას აფეთქდა. მაშინ რუსეთის თავდაცვის სამინისტროში თქვეს, რომ აფეთქებას რადიოაქტიური ან ქიმიური ნივთიერებებით დაბინძურება არ გამოუწვევია.

თუმცა, აფეთქების მომდევნო დღეებში რადიოაქტიური ნაწილაკების გლობალური ქსელის 4 სენსორი, რომლებიც აფეთქების ადგილთან ყველაზე ახლოს მდებარეობდა, გამოირთო.

ამის შესახებ ბირთვული გამოცდების აკრძალვის ორგანიზაციის (CTBTO) დირექტორი წერს. მისი თქმით 10 აგვისტოს "კომუნიკაციის პრობლემების" გამო კავშირი გაწყდა დუბნას და კიროვის მონიტორინგის სადგურებთან, ხოლო 13 აგვისტოს ბილიბინოს და ზალესოვოს საგდურებთან. ის არ გამორიცხავს, რომ სადგურების გათიშვა აფეთქებას უკავშირდებოდეს და რუსეთი ამგვარად ინფორმაციის დამალვას ცდილობდეს, თუმცა წერს, რომ ორგანიზაცია ინფორმაციას სხვა სადგურებიდან იღებს და ამუშავებს, ამიტომ რუსეთის მცდელობა უშედეგო იქნება.

სადგურებს რუსეთის თავდაცვის სამინისტრო ზედამხედველობს. ისინი სენსორების გამორთვაზე კომენტარს არ აკეთებენ.

რუსეთის ბირთვულმა სააგენტომ, როსატომმა აღიარა, რომ აფეთქებისას რადიოაქტიურ მასალაზე მომუშავე 5 ადამიანი დაიღუპა. აფეთქებამ მიმდებარე ქალაქში რადიაციის მაჩვენებლი ზრდა გამოიწვია.

აშშ-ში მიაჩნიათ, რომ რუსეთი ბირთვულ ძრავაზე მომუშავე რაკეტას ცდიდა, რომლის შექმნაც ვლადიმირ პუტინმა გასულ წელს დააანონსა.

20 აგვისტოს ვებ-გვერდმა Newsader-მა გაავრცელა ვიდეო, რომელშიც უცნობი რუსი ჯარისკაცი არხანგელსკის ოლქის ქალაქ ნიონოკსას მოსახლეობას რაკეტის გამოცდისას მომხდარი აფეთქების შედეგად რადიაციის საფრთხის შესახებ ესაუბრება.

ჯარისკაცი, რომლიც ვინაობაც არ კონკრეტდება ამბობს, რომ 1986 წელს ჩერნობილში იყო და ეს ორი შემთხვევა ერთმანეთს არაფრთი ჰგავს. მისი თქმით რაკეტის გამოცდისას ძრავის რაიოაქტიური იზოტოპები გამოიტყორცნა და აფეთქების შედეგად როსატომის თანამშრომლები დაიღუპნენ, ხოლო დასხივებული ადამიანები ქალაქ ნიონოკსაში გადაიყვანეს და მათი დაბინძურებული ტანსაცმელიც იქ გაწმინდეს.

მისივე თქმით გამოცდები ახალი არაა და ისინი არხანგელსკში დიდი ხანია ტარდება. ჯარისკაცი ამბობს, რომ ეს ბირთვული აფეთქება არ იყო, აფეთქდა პონტონი, რომელზეც გამოცდა ტარდებოდა და რადიოაქტიური ელემენტებით დაბინძურებული ნარჩენები ახლა სანაპიროზე ზღვას გამოაქვს, რის გამოც სანაპიროზე დაცვა დანიშნეს და ადგილობრივ მოსახლეობას მოუწოდებენ თავი შეიკავონ იქ გასვლისაგან ან სანაპიროდან რაიმე ნივთის წამოღებისაგან.

ახალი ვიდეო მეტი ვიდეო

შსს: მაღალტემპერატურულ ღუმელში 55 მლნ ლარის ღირებულების ნარკოტიკი გავანადგურეთ (VIDEO)

კომენტარები