ევროკავშირის სადამკვირვებლო მისია

რა ვითარებაა ჩორჩანა-წნელისის რაიონში - ევროკავშირის სადამკვირვებლო მისიის განცხადება

0 კომენტარი
ფოტო: პირველი არხი

ევროკავშირის სადამკვირვებლო მისია ჩორჩანა-წნელისის რაიონში მიმდინარე მოვლენებთან დაკავშირებით განცხადებას აქვეყნებს და წერს, რომ მისიის საპატრულო ჯგუფები 24 აგვისტოს შემდეგ რაიონში მუდმივად იმყოფებიან. 

მისიის ცნობით, მედიის მხრიდან არსებულ ვითარებაზე მაღალი ინტერესის გამო და არაზუსტი ცნობების გაქარწყლების მიზნით მისიას შემდეგი ინფორმაციის გავრცელება სურს:

"- მიმდინარე წლის იანვარიდან მისია აღნიშნავს ფერადი მონიშვნებს ხეებზე წნელისსა და ჩორჩანას შორის არსებულ ტერიტორიაზე. მისიამ შეაფასა აღნიშნული მონიშვნები როგორც "ბორდერიზაციის" ნიშნები, თუმცა ამ მონიშვნებზე პასუხისმგებლობა არ აიღო არცერთმა მხარემ.

- 20-24 აგვისტოს შსს-ს სპეციალურ დავალებათა დეპარტამენტის მიერ, სოფელ წნელისის განაპირას ახალი ქართული სათვალთვალო საგუშაგო მოეწყო. ევროკავშირის სადამკვირვებლო მისიის მონაცემებით, საგუშაგო მდებარეობს დაახლოვებით 240 მეტრის მოშორებით ადმინისტრაციული სასაზღვრო ხაზიდან, საქართველოს ცენტრალური ხელისუფლების კონტროლირებად ტერიტორიაზე, მითითებულ რაიონში არსებული ადმინისტრაციული სასაზღვრო ხაზის ტრადიციული აღქმის მიხედვით.

- სამხრეთ ოსეთის ძალოვანი უწყებების წარმომადგენლებმა, გასულ კვირას, მოაწყვეს რამდენიმე ახალი პოზიცია და დააყენეს ბორდერიზაციისთვის დამახასიათებელი ნიშნები მათ შორის "მწვანე ნიშნები" და დროშები ადმინისტრაციული სასაზღვრო ხაზის საქართველოს ცენტრალური ხელისუფლების მიერ კონტროლირებად მხარეს, აღნიშნული რაიონის ტრადიციული აღქმით. ზემოთხსენებული ნიშნები მდებარეობს ადმინსტრაციული სასაზღვრო ხაზიდან 1.3 კილომეტრის დაშორებით. ამავდროულად საქართველოს შინაგან საქმეთა სამინისტროს შენაერთებმა გააძლიერეს საკუთარი წარმომადგენლობა ჩორჩანის ტყის ტერიტორიაზე.

- მისია აღნიშნავს ჩორჩანა-წნელისის რაიონში, ძალოვანი უწყებების არსებით, უწყვეტ წარმომადგენლობას. რამდენიმე ახალი პოზიციის მოწყობა ადმინისტრაციულის სასაზღვრო ხაზის გასწვრივ და შეიარაღებული პირების მუდმივი კონცენტრაცია, ზრდის მათი მოულოდნელი შეხვედრის ალბათობას და წარმოადგენს რისკს სტაბილურობისთვის.

- ევროკავშირის სადამკვირვებლო მისიის მიერ ოპერირებადი ცხელი ხაზი აქტიურად გამოიყენება ინფორმაციის გაცვლისა და ადმინისტრაციული სასაზღვრო ხაზის ორივე მხარეს არსებული საკითხების განსახილველად. ევროკავშირის სადამკვირვებლო მისია, ადგილზე მუდმივი პატრულირების მეშვეობით რეაგირებს ცხელი ხაზის აქტივაციებზე.

- ევროკავშირის სადამკვირვებლო მისიამ და ეუთომ, ინციდენტების პრევენციის და მათზე რეაგირების მექანიზმების შეხვედრების ფარგლებში, ვითარების განმუხტვის და უფრო გრძელვადიანი დეესკალაციისათვის საჭირო კონკრეტული გამოსავლის მოსაძებნად 4 რიგგარეშე ტექნიკური შეხვედრა ჩაატარეს.

- უკანასკნელი ტექნიკური შეხვედრა ჩატარდა პარასკევს, 13 სექტემბერს ერგნეთში. შეხვედრა წარიმართა პროფესიონალურ ვითარებაში თუმცა პოზიციები განსხვავებული დარჩა. დადებითად შეიძლება აღინიშნოს, რომ ყველა მონაწილე მხარემ კიდევ ერთხელ დაადასტურა ძირითადი პრინციპების დაცვის მზადყოფნა შემდგომი ესკალაციისთვის თავის არიდების მიზნით ჩორჩანა-წნელისის რაიონში , მხარეები ასევე რჩებიან მშვიდობიანი გამოსავლის ძიების მომხრეები. მნიშვნელოვანია, რომ ეს მზადყოფნა აისახებოდეს ადგილზე მხარეთა წარმომადგენლობასა და მოქმედებებში".

სადამკვირვებლო მისია ასევე აღნიშნავს, რომ ოკუპირები ცხინვალის რეგიონთან საოკუპაციო ხაზზე არსებული 2 გადამკვეთი პუნქტი, ოძისი და სინგური 2019 წლის 4 სექტემბრის 20:00 საათის შემდეგ ამ დრომდე გადაკეტილია. 

მისიის განცხადებითვე, მათი გახსნის დროის შესახებ კონკრეტული მინიშნება არ გაკეთებულა, თუმცა ოკუპირებული ცხინვალის დე-ფაქტო ძალოვანი სტრუქტურების წარმომადგენლები მათ დაკეტვას ჩორჩანა-წნელისის რაიონში მიმდინარე მოვლენებს უკავშირებენ. 

"მისია ამ ზომებს აფასებს როგორც გადაადგილების თავისუფლებისთვის საზიანო შეზღუდვას, რომელსაც უარყოფითი გავლენა აქვს ადმინისტრაციული სასაზღვრო ხაზის ორივე მხარეს გადამკვეთებზე, განსაკუთრებით კი ახალგორის რაიონში მცხოვრებ ან რეგულარულად მიმომსვლელ მაცხოვრებლებზე. დაკეტილ გადამკვეთ პუნქტებზე, ევროკავშირის სადამკვირვებლო მისიის მიერ გადაადგილების თავისუფლებაზე ჩატარებული დაკვირვების შედეგად ყოველდღიურად ორივე მიმართულებით 400 გადასვლა ხდებოდა,"- წერია განცხადებაში. 

ახალი ვიდეო მეტი ვიდეო

თინათინ წულაძე

კომენტარები