ირანი

ფიფა: 10 ოქტომბრიდან ირანი ქალებს სტადიონებზე მატჩებზე დასწრების უფლებას მისცემს

0 კომენტარი
ფოტო: Getty Images

ფეხბურთის ასოციაციათა საერთაშორისო ფედერაცია (ფიფა) ამბობს, რომ ირანი ქალებს საფეხბურთო შეხვედრებზე სტადიონებზე დასწრების უფლებას მომავალ თვეს, მსოფლიო ჩემპიონატის საკვალიფიკაციო შეხვედრების დაწყებიდან მისცემს. ირანს პირველი შეხვედრა 10 ოქტომბერს კამბოჯის ნაკრებთან აქვს.

ფიფას პრეზიდენტმა ჯანი ინფანტინომ თქვა, რომ ეს საკითხი ირანის წარმომადგენლებთან ერთად განიხილა მას შემდეგ, რაც ქალმა, რომელიც ფეხბურთის სტადიონზე საყვარელი გუნდის თამაშის სანახავად კაცის ფორმაში გადაცმული შეიპარა და ამის გამო პატიმრობა ემუქრებოდა, თავი დაიწვა.

ინფანტინოს თქმით ირანის წარმომადგენლები არწმუნებენ, რომ ქალებს სტადიონებზე შესვლის უფლება მიეცემათ.

შეგახსენებთ, რომ მიმდინარე თვის დასაწყისში საჰარ ხოდაიარიმ თავი თეირანში, სასამართლოს შენობის წინ მას შემდეგ დაიწვა, რაც სასამართლო, რომელიც ფეხბურთის სტადიონზე შეპარვის გამო მის საქმეს განიხილავდა, გადაიდო. ის 10 სექტემბერს გარდაიცვალა.

ქალს მხარდამჭერებმა "ლურჯი გოგონა" შეარქვეს, საფეხბურთო კლუბ ესტეგლალ თეირანის გამო, რომლის ფანიც იყო და თამაშზე დასწრება სურდა.

საჰარი მარტში დააკავეს და სამდღიანი პატიმრობის შემდეგ გირაოთი გაათავისუფლეს. ის სასამართლო პროცესს 6 თვე ელოდა.

თვითმხილველების თქმით მას შემდეგ, რაც პროცესი გადაიდო მან გაიგო, რომ გამამტუვნებელი განაჩენის შემთხვევაში 6 თვიდან ორ წლამდე პატიმრობა ემუქრებოდა და თავის დაწვა სწორედ ამის შემდეგ გადაწყვიტა.

ირანში ქალებს სტადიონებზე კაცების თამაშებზე დასწრება 1981 წლიდან ეკრძალებათ. აკრძალვა დროებით გასულ წელს მოხსნეს და ქალებს საშუალება ჰქონდათ სტადიონზე, ეკრანზე ეყურებინათ მსოფლიო ჩემპიონატის თამაშებისათვის.

მიუხედავად იმისა, რომ აკრძალვა კანონის სახით არაა დაწერილი, მას მკაცრად იცავენ.

Fifa-მ ირანს ვადა 31 აგვისტომდე მისცა, რათა სტადიონზე ქალები დაეშვა, თუმცა ქვეყანა მოთხოვნას არ ასრულებს. Fifa-მ გაავრცელა განცხადება, რომელშიც მწუხარება გამოთქვეს ქალის გარდაცვალებასთან დაკავშირებით და ირანს კიდევ ერთხელ მოუწოდეს უზრუნველყოს იმ ქალების თავისუფლება და უსაფრთხოება, ვინც აკრძალვის მოხსნისათვის იბრძვიან.

მიმდინარე თვის დასაწყისში ირანში დაიწყო ონლაინ კამპანია, რომელიც სპორტულ ორგანიზაციებს მოუწოდებს ირანს შეჯიბრებსა და ჩემპიონატებში მონაწილეობაზე აკრძალვები დაუწესოს, რათა მთავრობამ სპორტში ჩარება შეწყვიტოს.

მსოფლიოს გარშემო ქალთა საფეხბურთო ნაკრების წევრებმა საჰარის ხსოვნისათვის მატჩებზე ლურჯი სამკლაურის ტარება დაიწყეს.

ახალი ვიდეო მეტი ვიდეო

ძალადობრივი აქციის მონაწილემ ტაბულას ჟურნალისტს დაარტყა და მობილური გააგდებინა

კომენტარები