ანტიდასავლური მედიის დაფინანსება

მთავრობა კვლავ აფინანსებს მედიებს, რომლებიც რუსულ პროპაგანდას ავრცელებენ

0 კომენტარი
რუსული პროპაგანდა

საქართველოს ხელისუფლება აგრძელებს იმ მედიების დაფინანსებას, რომლებიც სიძულვილის ენას იყენებენ, ანტიდასავლურ განწყობებს აღვივებენ და კრემლის პროპაგანდას ტირაჟირებენ.

მედიის განვითარების ფონდის კვლევის მიხედვით, 2018 წელს 7 მედია გამოიკვეთა, რომლებსაც სახელმწიფო დაწესებულებები რეკლამის და ინფორმაციის გავრცელების მიზნით კონტრაქტებს უფორმებენ. ეს მედიებია: საქართველოს რესპუბლიკა, Newspress.ge (nsp), თბილისი 24, ალია, მარშალპრესი, ობიექტივი, სამეფო არხი. მათგან ყველაზე მრავალრიცხოვანი და მაღალი ღირებულების კონტრაქტები გაზეთ საქართველოს რესპუბლიკასთან და ონლაინ გამოცემა Newspress.ge, nsp-სთან გაფორმდა.

გაზეთი საქართველოს რესპუბლიკა - ბიუჯეტიდან გადაუხადეს ჯამში 129.710 ლარი. დამკვეთები არიან:

  • გარემოს დაცვისა და სოფლის მეურნეობის სამინისტრო;
  • რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი;
  • მუნიციპალური განვითარების ფონდი;
  • სოფლის მეურნეობის მეცნიერებათა აკადემია;
  • აჭარის ა.რ. ფინანსთა და ეკონომიკის სამინისტრო;
  • სს "საქართველოს სახელმწიფო ელექტროსისტემა";
  • ენერგეტიკისა და წყალმომარაგების მარეგულირებელი ეროვნული კომისია;
  • საქპატენტი
  • სსიპ წიაღის ეროვნული სააგენტო
  • სხვა საქვეუწყებო ან ადგილობრივი ხელისუფლების სამსახურები

Newspress.ge, nsp - ჯამში ბიუჯეტიდან დაიხარჯა 36 173 ლარი. დამკვეთები არიან:

  • სასჯელაღსრულებისა და პრობაციის სამინისტრო;
  • ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო;
  • ცენტრალური საარჩევნო კომისია;
  • სოფლის მეურნეობის სამინისტროს ლაბორატორია;
  • ფინანსთა სამინისტროს მომსახურების სააგენტო;
  • აფხაზეთის ავტონომიური რესპუბლიკის ფინანსთა და ეკონომიკის სამინისტრო;
  • თავდაცვის ინსტიტუციური აღმშენებლობის სკოლა;
  • ქ. თბილისის დიდუბის რაიონის გამგეობა;
  • ნინოწმინდის მუნიციპალიტეტის მერია და სხვა საქვეუწყებო ან ადგილობრივი ხელისუფლების სამსახურები.

თბილისი 24 და გაზეთი ალია:

მედიის განვითარების ფონდის ინფორმაციით, სარეკლამო სააგენტო "კლიპარტთან" გაფორმებული ხელშეკრულების თანახმად, შვიდ მედია საშუალებაში ინფორმაციის განთავსების ღირებულება 50 000- ს ლარს შეადგენდა. აღნიშნული თანხის ნაწილი ონლაინ გამოცემა თბილისი 24-ზე და გაზეთ "ალიაზეც" გადანაწილდა, თუმცა, სამინისტროდან ორგანიზაციისთვის მიწოდებული ინფორმაცია თითოეულ მედიაზე განაწილებული ზუსტი თანხის იდენტიფიცირების შესაძლებლობას არ იძლევა. თუმცა, ცნობილია, რომ დამკვეთებს შორის არის სასჯელაღსრულებისა და პრობაციის სამინისტრო.

სააგენტო მარშალპრესი - ბიუჯეტიდან გადაუხადეს ჯამში 8 114 ლარი. დამკვეთები არიან:

  • სასჯელაღსრულებისა და პრობაციის სამინისტრო;
  • სამართლებრივი დახმარებისა და საზოგადოებრივი ჩართულობის მუნიციპალური ცენტრი;
  • ქედის მუნიციპალიტეტი;

ობიექტივი - ბიუჯეტიდან მიიღო 3746 ლარი. დამკვეთი:

  • ცენტრალური საარჩევნო კომისია

"სამეფო არხი" (ყოფილი ხარისხის არხი) - ბიუჯეტიდან დაიხარჯა 3100 ლარი. დამკვეთი:

  • ცენტრალური საარჩევნო კომისია

აღსანიშნავია, რომ ეს მედიები ინფორმაციისა და რეკლამის განთავსების მიზნით საბიუჯეტო ხელშეკრულებებს გასულ წლებშიც იღებდნენ.

ფოტო: მედიის განვითარების ფონდი
"მას შემდეგ რაც, რასიზმისა და შეუწყ­ნარებლობის წინააღმდეგ ევროპის კომისიის (ECRI) მეხუთე ციკლის ანგარიშში MDF-ის კვლევაზე დაყრდნობით, კომისიამ სახელმწიფოს რეკომენდაცია მისცა გადაეხედა იმ მედია საშუალებებთან არსებული კონტრაქტებისთვის, ვინც რასისტულ ან ჰომო/ტრანსფობიულ სიძულვილის ენის გამოვლენა­ში იყო შემჩნეული, გარკვეულ მედიებთან, მათ შორის ტვ “ობიექტივი”, გაზეთი “ალია”, ასეთმა თანამშრომლობამ იკლო, თუმცა როგორც 2018 წლის მონაცემები აჩვენებს, ანტიდისკრიმინაციული პოლიტიკა სხვა მედიებს არ შეხებია და ECRI-ის შესაბამისი რეკომენდაცია შესრულებული არ არის", - აღნიშნულია MDF-ის კვლევაში.

მიუხედავად ამისა, კვლევის მიხედვით, გარკვეულ მედიებთან მსგავსი კონტრაქტები შუამავლების მეშვეობით, არაპირდაპირ, ირიბად ფორმდებოდა. ესენია: "საქართველო რესპუბლიკა", ვლადიმერ ბედუკაძის გამოცემა "თბილისი 24" და ჰომოფობიური, პრორუსული "ალია".

მედიის განვითარების ფონდი ფინანსურ მედია გარემოს - მედიის დაფინანსების წყაროებს, მათ შორის ინფორმაციისა და რეკლამის გავრცელების მიზნით მედიაში საბიუჯეტო სახსრების განაწილების შესახებ ანგარიშს ყოველწლიურად გამოსცემს.

ანგარიში 2018 წელს მოიცავს და ეყრდნობა შემდეგი დოკუმენტების ანალიზს: სახელმწიფო შესყიდვების სააგენტოსა და კომუნიკაციების მარეგულირებელი კომისიის ელექტრონულ მონაცემთა ბაზაში ხელმისაწვდომი დოკუმენტაციის გარდა, დამატებით საჯარო დაწესებულებებიდან გამოთხოვნილ მონაცემებს და ღია წყაროებით გავრცელებულ სხვა ცნობებს. 

ახალი ვიდეო მეტი ვიდეო

შსს: დავაკავეთ ბიზნესპარტნიორები, რომლებმაც დავის გადასაწყვეტად კანონიერ ქურდებს მიმართეს

კომენტარები