ევროპული საქართველოს დეპუტატ გიგა ბოკერიას საზოგადოებრივი მაუწყებლის ეთერში, გადაცემის "თავისუფალი ხედვა" წამყვანებმა ჰკითხეს, თუკი იმ მოსამართლეებს, რომლებიც წინა ხელისუფლების დროს ზეგავლნის ქვეშ იყვნენ, არ აქვთ მორალური უფლება, ისევ სასამართლოში იყვნენ, მაშინ რა უფლება აქვთ, პოლიტიკაში იყვნენ, იმ ადამიანებს, ვინც სასამართლო სისტემის ამგვარი მოწყობის პროცესში მიიღო მონაწილეობა.
"ამ ადამიანებს, ისევე, როგორც ყველა სხვა ადამიანს, აქვთ უფლება, ამომრჩეველს მიმართონ, უთხრან, რა მიაჩნიათ თავიანთ მძიმე შეცდომად, თუნდაც დანაშაულად და ითხოვონ შანსი, რომ მისცენ ხმა. ამის უფლება გვაქვს მხოლოდ, დანარჩენს წყვეტს ამომრჩეველი.
მორალურად მაქვს თუ არა უფლება, ამასაც ამომრჩეველი წყვეტს. რომ ვთვლიდე, რომ მორალური უფლება არ მაქვს, რომ ამომრჩეველს მივმართო, აქ ხომ არ ვიჯდებოდი?"- ამბობს ბოკერია.
ჟურნალისტმა ჰკითხა, მაშინ რა განსხვავება იყო მოსამართლეების ნაწილში და თუ იქნებიან ისინი მისაღები კანდიდატურები იმ შემთხვევაში, თუ ქართული ოცნების გავლენიდან გავლენ.
"ისინი სავლეები კი არ არიან, ვინც პავლეებად იქცნენ. მთელი პრობლემაც ესაა. ადამიანს შეიძლება, ასეთ თანამდებობაზეც ჰქონდეს მეორე შანსი, ვიღაცამ შეიძლება, თქვას მესამეცო, უბრალოდ, ეს ხალხი ახლაც აგრძელებს ამას, იმავენაირად იქცევიან. არ შეუცვლიათ ზნე. ჩემი ამოცანაა, რომ იმ საკითხებში, რა საკითხებშიც სამართლიანად არის ამომრჩეველი მწყრალად იმ გუნდთან, რომელსაც ახლა მე წარმოვადგენ, ევროპული საქართველოს ნაწილთან იმიტომ, რომ იქ ახალი ხალხიც არის, რომ ამ ამომრჩევლებთან გულწრფელად მივიდე და ვუთხრა, რა მიმაჩნია სწორად, რაც გავაკეთეთ, რა მიმაჩნია არასწორად და რას გავაკეთებთ.
მორალური უფლება მაქვს, რომ მივიდე ამომრჩეველთან. იმიტომ, რომ მე მიმაჩნია, რომ ვარდების რევოლუციის შემდეგ ჯამში ქვეყანა წავიდა წინ. ფუნდამენტურად წინ," - ამბობს ბოკერია.
ჟურნალისტმა ბოკერიას წინა ხელისუფლების პერიოდში კანონის უზენაესობაზეც ჰკითხა, რადგან მისივე თქმით, ლიბერალური დემოკრატიის, რომელსაც ბოკერია მმართველობის საუკეთესო ფორმად მიიჩნევს, ერთერთი საყრდენი კანონის უზენაესობაა.
"ყველაფერი უნდა შევაფასოთ დინამიკაში, ფარდობითობაში. საქართველო დღესაც, ამ ხელისუფლების, ივანიშვილის, ჩემი აზრით, მავნებლური, დამანგრეველი ხელისუფლების მიუხედავადაც, უკეთეს ფორმაშია, ვიდრე ჩვენი ბევრი მეზობელი, სრული პატივისცემით იმ ხალხის მიმართ. ოღონდ ეს იმას არ ნიშნავს, ვერ დავინახო, რომ ჩემი ქვეყნის დინამიკა ამ 7 წლის განმავლობაში არის ჩიხისკენ, უფსკრულისკენ.
ახლა ვარდების რევოლუციის შემდეგი ამბავი ავიღოთ კანონის უზენაესის მხრივ, მათ შორის, სადაც მართლაც სერიოზული ჩავარდნა გვქონდა. უნდა შევადაროთ ქვეყანა 2002 წელს რა იყო და რა იყო 2012 წელს,"- თქვა ბოკერიამ.
წამყვანმა დეპუტატს სთხოვა, რომ ასევე შეედარებინა ისიც, როგორი იყო ქვეყანა 1991 წლიდან 2003 წლამდე, რაზეც ბოკერიამ უპასუხა, რომ წლების ფაზა არასწორადაა აღებული.
"უნდა შეადაროთ 1991 წლიდან 1996-97-მდე, როცა ქვეყანა გამოვიდა იმ უმძიმესი მდგომარეობიდან, რაც მოიტანა ჩემთვის ფასეულობებით ძალიან მიუღებელი ხელისუფლების [ზვიად გამსახურდიას ხელისუფლება] აბსოლუტურად დამანგრევემა დამხობამ.
ქვეყნის აქედან გამოსვლაში შევარდნაძეს მოძულეებმაც კი კრედიტი დაუწერეს, მაგრამ ამის შემდეგ, 1997 წლის შემდეგ ქვეყანა წინ კი არა, უკან წავიდა. ამაზეა ლაპარაკი," - თქვა ბოკერიამ.
გიგა ბოკერიას თქმით, ახლა კანონის უზენაესობის თვალსაზრისით ქვეყანა უკან მიდის, რაც მისი თქმით, კრიმინალისა და ორგანიზებული დანაშაულის გავლენის ზრდაში გამოიხატება.
"მთავრობა ფასეულობებით შერწყმულია ქსენოფობიურ, პრორუსულ, სიძულვილის მქადაგებელ ჯგუფებთან და ეს მხოლოდ ჩემი შეფასება არ არის. ყველა დაინტერესებულს შეუძლია, არჩევნების დროს საარჩევნო უბნებთან მივიდეს და ნახოს, ვინ დგას იქ. ვინ არის მთავრობის მოკავშირე? კრიმინალი. და ვინ არიან მისი მოკავშირეები ახლა? გახარიას ვინ მოუწყო ოვაციები? პროპუტინური ჯგუფები, რომლებიც ქადაგებენ სიძულვილს ყველა უმცირესობის მიმართ. ქვეყანა მიდის უკან და ეს არის მთავარი,"- თქვა ბოკერიამ.
