თამარ მეარაყიშვილი

ოკუპირებული ცხინვალის ე.წ სასამართლომ თამარ მეარაყიშვილი მესამედაც გაამართლა

0 კომენტარი
თამარ მეარაყიშვილი ფოტო: თამარ მეარაყიშვილი

ახალგორელი ჟურნალისტი და აქტივისტი, თამარ მეარაყიშვილი, რომელსაც ოკუპირებულ რეგიონში აქტივიზმის გამო დევნიან, ამბობს, რომ ახალგორის ე.წ სასამართლომ მესამედაც გაამართლა.

"მესამედ მოვიგე სასამართლო. მესამედ აღიარა სასამართლომ, რომ არანაირი დანაშაული ჩავიდინე. სასამართლომ მომცა უფლება ვიდაო რეაბილიტაციაზე", - დაწერა მან ფეისბუქზე.

მანამდე კი ოკუპირებული ცხინვალის რეგიონის პროკურატურამ ე.წ სასამართლოს ზემდგომ ინსტანციაში გაასაჩივრა გადაწყვეტილება, რომელიც 10 ივლისს გამოვიდა და რომლითაც ჟურნალისტი და აქტივისტი, თამარ მეარაყიშვილი წარდგენილ ბრალში უდანაშაულოდ ცნო.

მას ბრალი ედებოდა პარტია "ერთიანი ოსეთის" მისამართით ცილისმწამებლური ინფორმაციის გავრცელება, ასევე, გაყალბებული დოკუმენტის მეშვეობით ოკუპირებული სამხრეთ ოსეთის ე.წ. მოქალაქეობის უკანონო მოპოვება.

ამასთან, ე.წ. სასამართლომ ჟურნალისტს გადაადგილებასთან დაკავშირებული ყველა შეზღუდვა მოუხსნა.

"ორწლიანი თავდაუზოგავი შრომა, ფიზიკური და ფსიქიკური პრობლემები, მაგრამ როგორც იქნა, სამართლიანობამ იზეიმა და ჩვენ მივიღეთ ის გადაწყვეტილება, რომელიც უნდა ყოფილიყო. მის ქმედებებში სასამართლომ ვერ აღმოაჩინა დანაშაული, მან თქვა, რომ თამარ მეარაყიშვილის დანაშაული არ ჩაუდენია", - ამბობს ჟურნალისტის ადვოკატი "ეხო კავკაზა"-სთან.

თამარ მეარაყიშვილს​ 2017 წელს თავისუფლება ორჯერ უკანონოდ აღუკვეთეს. მას ჩამორთმეული ჰქონდა პირადობის დამადასტურებელი დოკუმენტები და ჯანმრთელობის რთული მდგომარეობის მიუხედავად, საქართველოს კონტროლირებად ტერიტორიაზე გადმოსვლა და მკურნალობა არ შეეძლო.

ჟურნალისტი და აქტივისტი 2017 წლის 8 ივნისს, დაკითხვისა თუ დაშინების მიზნით ახალგორიდან ოკუპირებულ ცხინვალში გაიტაცეს. ახალგორის ე.წ. პროკურატურამ ე.წ. ხელისუფლების პარტიის, "ერთიანი ოსეთის" მისამართით ცილისწამების ბრალდებით მის წინააღმდეგ სისხლის სამართლის საქმე აღძრა. ამას საფუძვლად დაედო ჟურნალისტის კრიტიკული მოსაზრებები პარტიის "ცალკეული პირების მიმართ". საერთაშორისო მხარეების ჩართულობამ შედეგი გამოიღო და თამარ მეარაყიშვილი საკუთარ სახლში დააბრუნეს.

2018 წლის 4 სექტემბერს ახალგორის ე.წ. სასამართლომ სისხლის სამართლის საქმე დაუსაბუთებლად ცნო და მიიჩნია, რომ არ არსებობდა დანაშაულის არც შემადგენლობა, არც ჩადენის დრო და ადგილი. ე.წ. პროკურატურამ გადაწყვეტილება არ გაასაჩივრა, თუმცა თამარ მეარაყიშვილს ორი ახალი ბრალი წარუდგინა - ოფიციალური დოკუმენტის არაკანონიერი მოპოვება და მისი გამოყენება. მათი მტკიცებით, ჟურნალისტმა სამხრეთ ოსეთის ე.წ. მოქალაქეობა მიიღო და საქართველოს მოქალაქეობაც შეინარჩუნა

აღსანიშნავია, რომ თამარ მეარაყიშვილის გატაცების საკითხი ჟენევაში საერთაშორისო დისკუსიების მორიგი რაუნდის დროსაც განიხილეს. ჟურნალისტი და აქტივისტი Facebook-ის საკუთარ გვერდსა და "ეხო კავკაზასთან" რესპონდენტის სტატუსით ხშირად წერდა და საუბრობდა რაიონის პრობლემებზე, მათ შორის მარიონეტ ხელმძღვანელ პირთა ქმედებებზე.

ახალი ვიდეო მეტი ვიდეო

მოპედის ქურდობისთვის თბილისში ერთი პირი დააკავეს (ვიდეო)

კომენტარები